Alpha News-ը մրցանակ է ստացել Մոսկվայում կայացած «Ազնիվ հայացք» 3-րդ միջազգային մրցանակաբաշխությունում

Alpha News լրատվական գործակալությունը մրցանակ է ստացել Մոսկվայում անցկացված օտարերկրյա լրագրողների և բլոգերների 3-րդ միջազգային «Ազնիվ հայացք» մրցանակաբաշխությունում։

Alpha Media House-ի գլխավոր խմբագիր Տիգրան Քոչարյանին «Alter Ego» նախագծի համար մրցանակ է շնորհվել «Ռուսաստանի հետ միջազգային մշակութային գործընկերության մասին լավագույն նյութ» անվանակարգում:

Իր գոյության երեք տարիների ընթացքում 2024 թվականի մրցույթում ստացվել են ռեկորդային թվով հայտեր՝ 488 մրցութային նյութեր աշխարհի 59 երկրից, այդ թվում՝ Արգենտինայից, Գերմանիայից, Իսրայելից, Հնդկաստանից, Իրանից, Կանադայից, Չինաստանից, Նորվեգիայից, Ռումինիայից, Սերբիայից, Սլովակիայից, Թուրքիայից, Աֆրիկայի 19 երկրներից և ԱՊՀ բոլոր երկրներից:

«Ազնիվ հայացք» մրցանակաբաշխության նպատակն է բացահայտել արտասահմանյան ԶԼՄ-ների և հեղինակների լավագույն նյութերը, որոնք լուսաբանում են արտերկրում Ռուսաստանի Դաշնության հումանիտար, մշակութային և տնտեսական նախաձեռնությունները, ինչպես նաև Ռուսաստանի հետ համատեղ գլոբալ և միջտարածաշրջանային նախագծերը: Կազմակերպիչների կարծիքով՝ աշխարհը Ռուսաստանի, նրա միջազգային գործունեության և արտասահմանյան նախագծերի մասին օբյեկտիվ տեղեկատվության պահանջարկ ունի։