140 արցախցի երեխա կմկրտվի նույն օրը՝ 7 կնքահայրերով ու 7 քահանաներով

Նոյեմբերի 14-ին 140 արցախցի երեխա կմկրտվի։ Նրանք կմկրտվեն 7 կնքահայրերով ու 7 քահանաներով: Այս մասին հայտնում է Մասյացոտնի Թեմի Տեղեկատվական համակարգը։

«Նոյեմբերի 14-ին, օրհնությամբ Մասյացոտնի Թեմի առաջնորդ Տեր Գևորգ եպիսկոպոս Սարոյանի, Մասիս համայնքի եկեղեցիներում կկատարվեն Արցախից բռնի տեղահանված մեր հայրենակիցների մկրտության արարողությունները։ Այս առիթով նոյեմբերի 10-ին Մասիս քաղաքի Սուրբ Թադեոս եկեղեցում տեղի է ունեցել Մասիս համայնքի քահանա հայրերի, 140 արցախահայերի և նրանց ապագա կնքահայրերի հանդիպումը: Հանդիպման ընթացքում քահանա հայրերը խոսել են Մկրտության խորհրդի նշանակության մասին, որից հետո արցախահայերից յուրաքանչյուրը ծանոթացել է իր կնքահոր հետ։

Արցախահայերի մկրտության արարողությունները կկրեն շարունակական բնույթ»,- նշված է հայտարարության մեջ։