Ադրբեջանն ի չիք է դարձնում 2020 թ. նոյեմբերի 9-ի համաձայնագիրը՝ ցույց տալով, որ ինչ ուզեն՝ կանեն. Դավիթ Բաբայան
15 Հունիսի 2023, 15:00
Ադրբեջանը չի թույլատրում ո՛չ հիվանդներին տեղափոխել, ո՛չ բեռներ բերել: Այս մասին Alpha News-ի հետ զրույցում ասաց Արցախի նախագահի խորհրդական Դավիթ Բաբայանն՝ անդրադառնալով Հակարիի կամրջի մոտ ստեղծված իրավիճակին:
«Կապ չունի, որ այնտեղ Կարմիր խաչն է, ռուս խաղապահներն են: Ադրբեջանն ի չիք է դարձնում 2020 թ. նոյեմբերի 9-ի համաձայնագիրը, ցույց տալով, որ ինչ ուզեն՝ կանեն՝ հարվածելով, նվաստացնելով, այդ թվում՝ Ռուսաստանին: Այդ համաձայնագրում որտե՞ղ է գրված, որ Ադրբեջանը կարող է նման բան անել: Լաչինի միջանցքը միջազգայանորեն ֆիքսված այլ կարգավիճակ ուներ, սրա մասին պետք է մտածենք, իսկ որոշ խելոքներ խոսում են երաշխիքների մասին: Բորելն ասում է՝ «մենք Ադրբեջանին խնդրում ենք, իրենք չեն ընդունում, ի՞նչ անենք», ոնց թե ինչ անեք, բա դուք ինչի համար եք»,- նշեց Դավիթ Բաբայանը:
Բաբայանի համոզմամբ՝ Ադրբեջանի նման վարքագիծը պայմանավորված է մի քանի հանգամանքով:
«Էրդողանն այցելեց Ադրբեջան, գոտեպնդեց: Տեսնում ենք նաեւ ժողովրդավարական հանրության այլասերված լինելը, որոնք որեւէ կերպ չեն արձագանքում Արցախի շուրջ կատարվող գործընթացներին, հակառակը՝ գոտեպնդում են ոչ ժողովրդավարական երկրի ագրեսիան ժողովրդավարական երկրի նկատմամբ: Այս ամենը առիթ է հանդիսանում, որպեսզի Ադրբեջանը Թուրքիայի հետ մեկտեղ իրենց քաղաքականությունը կոշտացնեն: Միամիտ կլիներ մտածել, որ իրենք չպետք է դա անեն»,- ասաց Բաբայանը:
Հիմա եթերում
