Յուրի Դոխոյան․ Աշխարհի լավագույն շախմատային մարզիչը

Alpha News-ը շարունակում է ներկայացնել «Ալֆա պերսոնա» շարքը:

Հոկտեմբերի 26-ին շախմատիստ, գրոսմայստեր և շախմատի մարզիչ Յուրի Դոխոյանի ծննդյան օրն է։

Ծնվել է Ալթայի երկրամասի Զիրյանովկա գյուղում։ Նրա մանկությունն անցել է Մոսկվայի հայտնի շախմատի գիշերօթիկ դպրոցում։ Նա նաև հաճախել է Տիգրան Պետրոսյանի անվան շախմատի ակումբ։

Դոխոյանն իր առաջին հաջողությունները սկսել է Մոսկվայի ֆիզկուլտուրայի ինստիտուտում ուսանելու տարիներին, երբ դարձել է Բուխարեստի միջազգային մրցաշարի հաղթող, իսկ պատանի վարպետների համամիութենական մրցաշարում արժանացել է արծաթե մեդալի։

Արդեն 1988 թվականին Յուրի Դոխոյանը գրոսմայստեր է դարձել։ Շախմատիստը հաջողությամբ հանդես է եկել միջազգային մրցաշարերում, սակայն շուտով թողել է խաղը և անցել մարզչական աշխատանքի։ Հետագայում Դոխոյանը սկսել է համարվել աշխարհի լավագույն մարզիչներից մեկը՝ ստանալով ՖԻԴԵ-ի ավագ մարզիչի և Ռուսաստանի վաստակավոր մարզիչի կոչումներ։

Դոխոյանը մարզել է Կոսինցևա քույրերին, ապա՝ Ռուսաստանի կանանց շախմատի հավաքականը։ Վարպետի գլխավորությամբ 2010 թվականին աղջիկները 100 տոկոսանոց արդյունքով նվաճել են օլիմպիական ոսկին, իսկ 2011 թվականին դարձել են Եվրոպայի չեմպիոն ՝ ոչ-ոքի խաղալով ընդամենը մեկ խաղ։

2011-2015 թվականներին Դոխոյանը եղել է տղամարդկանց ազգային հավաքականի մարզիչը։ 2012 թվականին նրա սաները Օլիմպիական խաղերում նվաճել են արծաթե մեդալ, իսկ 2013 թվականին՝ հաղթել են աշխարհի թիմային առաջնությունում։ Յուրի Դոխոյանն անձամբ աշխատել է նաև ռուս առաջատար գրոսմայստերների, մասնավորապես Սերգեյ Կարյակինի հետ։ Հարկ է նշել, որ նրա սաների թվում էր ռուս ամենահեռանկարային շախմատիստներից մեկը՝ Անդրեյ Եսիպենկոն։

Յուրի Դոխոյանը մահացել է 2021 թվականի հուլիսի 1-ին Մոսկվայում՝ կորոնավիրուսի հետևանքով։