Ռուսաստանն ու Իրանը քննարկում են Ադրբեջանից Պարսից ծոց երկաթգծի կառուցման հարցը

Ռուսաստանն ու Իրանը բանակցում են իրանական Փարսաբադ քաղաքից մինչև Պարսից ծոցի ափին գտնվող իրանական խոշորագույն Բանդար Աբբաս նավահանգիստ երկաթուղու կառուցման շուրջ։ Այս մասին հայտնել է ՌԴ-ում Իրանի դեսպան Քազեմ Ջալալին ԻԻՀ նախագահ Մասուդ Փեզեշքիանի հետ հանդիպմանը, փոխանցում է ՏԱՍՍ-ը։

«Բացի Ռեշտ-Աստարա երկաթուղային գծից, ռուսները ցանկանում են ներդրումներ կատարել Փարսաբադից մինչև Բանդար Աբբաս ռուսական ստանդարտ երկաթուղու կառուցման համար», — ասել է նա:

Փեզեշքիանը նշել է, որ «երկաթուղիների ընդլայնումը հյուսիսից հարավ օգուտ է բերում երկրի ժողովրդին ու տնտեսությանը և կարող է բավարարել Ռուսաստանի և Իրանի տնտեսական կարիքները»: Իրանի նախագահը կարգադրել է արագացնել Ռեշտ-Աստարա երթուղու կառուցումը։