Իրանն ու Իսրայելը փոխադարձ զանգվածային հարվածներ են հասցրել

Ուրբաթ լույս շաբաթ գիշերը նշանավորվել է Իրանի և Իսրայելի միջև լարվածության նոր փուլով։ Երկու կողմերն էլ ինտենսիվ հարվածներ են հասցրել միմյանց, ինչը հանգեցրել է զգալի ավերածությունների և մարդկային զոհերի։

Իսրայելական ԶԼՄ-ների տվյալներով՝ իրանական կողմից Իսրայելի տարածքի ուղղությամբ արձակվել է շուրջ 200 հրթիռ: Հարվածները հասցվել են Թել Ավիվին, Երուսաղեմին, Բեեր Շևային և այլ խոշոր քաղաքների։ Տուժած օբյեկտների թվում է Թել Ավիվի Կիրիա կառավարական շենքերի համալիրը, որտեղ գտնվում է Իսրայելի զինված ուժերի կենտրոնակայանը: Հարձակման հետևանքով զոհվել է 4 մարդ, ավելի քան 70-ը վիրավորվել են:

Ի պատասխան՝ իսրայելական օդուժը ավիահարվածներ է հասցրել Իրանում մի շարք ռազմավարական թիրախների, այդ թվում՝ Թեհրանի շրջանում գտնվող ՀՕՊ համակարգերի ուղղությամբ: Սա հակամարտության սկզբից ի վեր իրանական մայրաքաղաքի վրայով իսրայելական ռազմական ինքնաթիռների թռիչքի առաջին դեպքն է: Իրանում հաղորդվում է 78 զոհի և ավելի քան 320 վիրավորի մասին:

Միջազգային հանրությունը մտահոգություն է հայտնում և անհապաղ դեէսկալացիայի կոչ անում։