Ամենայն Հայոց Կաթողիկոսն ընդունել է ԱՄՆ Հայոց Արևելյան թեմի ուխտավորներին

Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է ԱՄՆ Հայոց Արևելյան թեմի ուխտավորներին` ուղեկցությամբ Նյու Յորքի Սուրբ Գրիգոր Լուսավորիչ եկեղեցու հոգևոր հովիվ Արժանապատիվ Տ. Մեսրոպ քահանա Հովսեփյանի և Չիկագոյի Սուրբ Գրիգոր Լուսավորիչ եկեղեցու հոգևոր հովիվ Արժանապատիվ Տ. Անդրեաս քահանա Կարապետյանի:

Տեր Մեսրոպը, հայցելով Նորին Սրբության օրհնությունը, ներկայացրել է ուխտավորաբար Մայր Աթոռ ժամանած հավատացյալներին։

Վեհափառ Հայրապետն իր սերն ու օրհնությունը բերել է ուխտավորներին և իր գնահատանքը փոխանցել հոգևոր հովիվներին արդյունավետ սպասավորության համար:

Ամենայն Հայոց Կաթողիկոսը կարևորել է աշխարհասփյուռ հայոց թեմերից նման ուխտագնացությունների կազմակերպումը, հատկապես հայրենիքի համար այս ծանր օրերին, ինչը հնարավորություն է ընձեռնում հաղորդ դառնալու Հայաստանում և Արցախում առկա մարտահրավերներին։ Այս առնչությամբ Նորին Սրբությունը հորդորել է ԱՄՆ Հայոց Արևելյան թեմի ուխտավորներին իրենց երկրում բարձրաձայնելու Արցախում և Հայաստանում տիրող իրավիճակի մասին ու հետևողական ջանքեր գործադրելու արցախահայության անվտանգ կյանքի, ազատ ու անկախ ապրելու իրավունքի պաշտպանության համար։

Իր խոսքում Ամենայն Հայոց Կաթողիկոսը նաև պատգամել է ուխտավորներին աջակից և զորակից լինել իրենց հոգևոր հովիվներին, ճիգ ու ջանք չխնայել ի նպաստ իրենց համայնքների զորացման, երիտասարդ սերնդի մոտ ազգային ինքնության պահպանության։

Վերջում Հայոց Հայրապետը պատասխանել է ուխտավորների հարցերին, որոնք վերաբերում էին Հայաստանում և Արցախում առկա մարտահրավերների հաղթահարմանը։