Հայաստանն ու Ադրբեջանն ԱՊՀ գործունեությանը մասնակցության շահագրգռվածություն են դրսևորում․ ՌԴ ներկայացուցիչ
30 Օգոստոսի 2025, 18:30
Անկախ պետությունների համագործակցությունը (ԱՊՀ) հետաքրքրություն է նկատում ինչպես Հայաստանի, այնպես էլ Ադրբեջանի կողմից՝ կազմակերպության աշխատանքներին մասնակցելու հարցում։ Այս մասին ՏԱՍՍ-ին տված հարցազրույցում հայտարարել է ԱՊՀ կանոնադրական և այլ մարմիններում Ռուսաստանի Դաշնության մշտական ներկայացուցիչ Անդրեյ Գրոզովը։
«Ուզում եմ ընդգծել, որ մենք տեսնում ենք երկու կողմերի շահագրգռվածությունը մեր միության գործունեությանը մասնակցելու հարցում»,- ասել է նա։
Պատասխանելով ԱՊՀ շրջանակում Հայաստանի և Ադրբեջանի փոխգործակցության մասին հարցին՝ Գրոզովը նշել է, որ մասնակիցները ձգտում են «ծագող հարցերը լուծել բարիդրացիության և փոխադարձ հարգանքի մթնոլորտում»։
«Ռուսաստանի կողմից մենք միշտ ձգտում ենք մեր գործընկերներին նախապատրաստել կառուցողական փոխգործակցության։ Պետություններն ինքնուրույն են որոշումներ կայացնում՝ առաջնորդվելով իրենց սեփական դատողություններով, թե արդյոք մասնակցել այս կամ այն մարմնի աշխատանքներին։ Դա նրանց ինքնիշխան իրավունքն է»,- հավելել է Գրոզովը՝ խոսելով ԱՊՀ Տնտեսական խորհրդի նիստին Ադրբեջանի ներկայացուցիչների բացակայության մասին։
Հիմա եթերում
