Արման Անդրեասյանը հաղթեց ադրբեջանցի մարզիկին

Հայ ազատ ոճի ըմբիշ Արման Անդրեասյանը (70 կգ) դիտարժան գոտեմարտում դուրս եկավ Աշխարհի առաջնության 2025-ի կիսաեզրափակիչ, որն ընթանում է Խորվաթիայի մայրաքաղաք Զագրեբում։

25-ամյա մարզիկը մրցաշարը սկսեց դժվար հաղթանակով՝ տաջիկ ըմբիշ Վիկտոր Ռասսադինի նկատմամբ, վճռական միավորը վաստակելով ընդամենը 2 վայրկյան առաջ՝ մինչև գոտեմարտի ավարտը։ Այնուհետև Անդրեասյանը վստահ հաղթանակ տարավ սերբ Վիկտոր Վոյնովիչի նկատմամբ։

Քառորդ եզրափակչում նրա մրցակիցն էր ադրբեջանցի ըմբիշ Քանան Հեյբաթովը, ով նախապես ջախջախել էր մրցաշարի ֆավորիտներից մեկին՝ իրանցի Ամիր Յազդանիին (15:4): Հեյբաթովը մի քանի անգամ առաջ անցավ և գոտեմարտի ավարտից 20 վայրկյան առաջ 6:3 հաշվով հաղթում էր։ Սակայն Անդրեասյանը ցույց տվեց կամքի ուժ և կարողացավ հաղթել 8:6 հաշվով։

Կիսաեզրափակչում Անդրեասյանը կմրցի ճապոնացի Յասինոսուե Աոյագիի հետ, ում արդեն հաղթել էր Աշխարհի առաջնությունում 2023-ին։