Ուրարտուի արվեստը՝ կրկին Պուշկինի թանգարանում

Մոսկվայի Պուշկինի անվան կերպարվեստի պետական թանգարանում վերաբացվել է Ուրարտուի արվեստին նվիրված ցուցադրությունը։ Հին Մերձավոր Արևելքի արվեստի սրահում ներկայացված են Էրեբունի և Թեյշեբաինի ամրոցներից բերված եզակի հուշարձանները, որոնք վերադարձել են գրեթե երկու տարվա ընդմիջումից հետո։

Ցուցանմուշների վերադարձին նախորդել էր գեղանկարչության և մետաղապլաստիկայի ստեղծագործությունների լայնածավալ վերականգնումը, որը սկսվել էր «Ուրարտուի թագավորությունը․ Հին Հայաստանի ժառանգությունը․ Ուրաշտու–Հարմինուա–Արմինա» ցուցահանդեսի ավարտից հետո։