Կարգալույծ հռչակված անձինք որևէ աշխարհիկ որոշմամբ չեն կարող վերականգնել քահանայական իշխանությունը․ Արագածոտնի թեմ

Արագածոտնի թեմի մի խումբ հոգևորականներ հրապարակային հայտարարությամբ մերժել են Արմավիրի մարզի առաջին ատյանի դատարանի միջանկյալ որոշումները, որոնցով իրենց փաստացի պարտադրվում է որպես հոգևոր հովիվներ ճանաչել Մայր Աթոռի կողմից կարգալույծ հռչակված երկու նախկին քահանաների:

Հոգևորականները շեշտում են, որ դատարանի որոշումները հակասում են եկեղեցական կանոնակարգին և Եկեղեցու ինքնակառավարման սահմանադրական սկզբունքին։

Նրանց խոսքով՝ կարգալույծ հռչակված անձինք աշխարհական են և որևէ աշխարհիկ որոշմամբ չեն կարող վերականգնել քահանայական իշխանությունը։

Հայտարարության հեղինակները որոշումները գնահատում են որպես անհամատեղելի իրենց ուխտի, խղճի և դավանանքի ազատության հետ և նշում, որ դրանց կատարումը «օբյեկտիվորեն անհնար է»։

Նրանք նաև ընդգծում են, որ չեն ենթարկվելու այնպիսի պարտադրանքների, որոնք դիտարկում են որպես միջամտություն Եկեղեցու ներքին կյանքին։