ՄՔԴ-ի գլխավոր դատախազ Քարիմ Խանին ազատել են պաշտոնից սեքսուալ ոտնձգությունների մեղադրանքների պատճառով

Միջազգային քրեական դատարանի անդամ պետությունների մեծամասնությունը՝ 125 անդամ պետություններից 82-ը, քվեարկել է գլխավոր դատախազ Քարիմ Խանին պաշտոնից հեռացնելու օգտին։ Սա դատարանի պատմության մեջ առաջին նման դեպքն է։ Որոշումը կայացվել է սեռական ոտնձգությունների մեղադրանքների հետաքննությունից հետո, որը Խանը շարունակում է հերքել՝ գրում է Reuters-ը։

56-ամյա բրիտանացի փաստաբան Քարիմ Խանը հրաժարական է տվել մեկ տարի առաջ՝ սեռական ոտնձգությունների մեղադրանքների պատճառով։ Սակայն նա հերքում է մեղադրանքները և հայտնել է հետաքննության հետ համագործակցելու իր պատրաստակամությունը։

Լրատվականը նշում է, որ լսումները, որոնց ընթացքում քննարկվել է Խանի հրաժարականը, տեղի են ունեցել Միացյալ Նահանգներում՝ մի երկրում, որը չի աջակցում Հռոմի կանոնադրությանը և նույնիսկ պատժամիջոցներ է կիրառել ՄՔԴ 12 աշխատակցի նկատմամբ։ Հաագայում գտնվող դատարանի գլխավոր դատախազն անձամբ չի կարողացել մասնակցել լսումներին, քանի որ Վաշինգտոնի պատժամիջոցները թույլ չեն տալիս նրան մուտք գործել երկիր։

Պատժամիջոցները սահմանվել են ի պատասխան դատարանի կողմից Իսրայելի բարձրաստիճան պաշտոնյաների, այդ թվում՝ վարչապետ Բենիամին Նեթանյահուի ձերբակալման օրդերների՝ կապված Գազայի պատերազմի հետ: Այն կապված է նաև Միջազգային քրեական դատարանի կողմից Աֆղանստանում ամերիկյան զինվորական անձնակազմի գործունեության վերաբերյալ հետաքննությունների հետ։

ԱՄՆ պետքարտուղար Մարկո Ռուբիոն անցյալ շաբաթ հայտարարել էր, որ Միացյալ Նահանգները սկսում է «համապարփակ արշավ՝ վերացնելու Միջազգային քրեական դատարանի կողմից ԱՄՆ ինքնիշխանությանը ներկայացվող սպառնալիքը»։

Ռուբիոյի խոսքով՝ Վաշինգտոնը մտադիր է հասնել ՄՔԴ կազմից պետությունների դուրս գալուն, պատժամիջոցներ սահմանել դատարանի հետ համագործակցող կազմակերպությունների դեմ, ինչպես նաև արգելել նրա աշխատակիցների մուտքը ԱՄՆ: