Ադրբեջանը գործնականում ապացուցել է իր հավատարմությունը Հայաստանի հետ խաղաղ գործընթացին․ Հիքմեթ Հաջիև
05 Օգոստոսի 2026, 17:40
Հայ-ադրբեջանական խաղաղ գործընթացը չի սահմանափակվում միայն թղթի վրա արված հայտարարություններով։ Ադրբեջանն իր հավատարմությունը խաղաղության օրակարգին ցույց է տվել նաև գործնական քայլերով։ Այս մասին թուրքական «Milliyet» թերթին տված հարցազրույցում հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության հարցերի բաժնի ղեկավար Հիքմեթ Հաջիևը։
Նրա խոսքով՝ ներկայում Հարավային Կովկասում խաղաղություն է հաստատվել, իսկ հակամարտության շարունակման դեպքում տարածաշրջանը կարող էր բախվել նոր վտանգների։
«Եթե հայ-ադրբեջանական պատերազմը շարունակվեր, մեր հարևան երկրներում տեղի ունեցող հակամարտությունների կայծերը կարող էին տարածվել նաև մեր տարածաշրջան», — ասել է Հաջիևը։
Ադրբեջանի նախագահի օգնականը դրական է գնահատել Հայաստանի իշխանությունների կողմից «իրական Հայաստան» հայեցակարգի որդեգրումը՝ որպես քաղաքական հիմնական ուղղություն։
Հաջիևի խոսքով՝ հայկական կողմը, ըստ իրեն, ընդունել է նոր աշխարհաքաղաքական իրողությունները և իր քաղաքականությունը ձևավորում է այդ պայմաններին համապատասխան։
«Հայաստանը հասկացել է, որ նախկինում իրականացվող քաղաքականությունը իրեն պահում էր փակուղային իրավիճակում, և այժմ գիտակցում է Ադրբեջանի ու Թուրքիայի հետ հարաբերությունների կարևորությունը սեփական զարգացման համար», — նշել է նա։
Անդրադառնալով տարածաշրջանային հաղորդակցությունների բացմանը՝ Հաջիևը հայտարարել է, որ Զանգեզուրի երթուղու գործարկումը նոր աշխարհաքաղաքական իրողությունների մաս է և, ըստ նրա, կարող է բխել ինչպես Ադրբեջանի, այնպես էլ Հայաստանի շահերից։
Նրա խոսքով՝ Հայաստանը նույնպես հասկանում է, որ տարածաշրջանում տարանցիկ հնարավորությունների զարգացումը կարևոր նշանակություն ունի երկրի տնտեսական առաջընթացի համար։
Հիմա եթերում
