Մարդու իրավունքները պաշտպանված են միայն ՔՊ-ի համակիրների համար․ Աննա Գրիգորյան

Հայաստանում մարդու իրավունքները պաշտպանված են միայն իշխող «Քաղաքացիական պայմանագիր» կուսակցության համակիրների համար, մինչդեռ այլ քաղաքական հայացքներ ունեցող քաղաքացիները կամ բիզնեսի ներկայացուցիչները վերածվում են քաղաքական հալածյալների։ Այս մասին Ազգային ժողովում հայտարարել է «Հայաստան» խմբակցության ղեկավար Աննա Գրիգորյանը։

Նրա խոսքով՝ Հայաստանում մարդու իրավունքների պաշտպանությունն իրականացվում է բացառապես երկակի ստանդարտների մոտեցմամբ։

«Սիրել և խոնարհվել միայն այն մարդկանց առջև, ովքեր քո համակիրն են, գետնին ու ասֆալտին փռել նրանց, ովքեր քո համակիրը չեն․ սա է ձեր մոտեցումը։ Սա վերաբերում է թե՛ սովորական քաղաքացիներին, թե՛ տարբեր ոլորտների ներկայացուցիչներին, այդ թվում՝ բիզնեսին», — նշել է պատգամավորը։

Որպես օրինակ՝ Աննա Գրիգորյանը հիշատակել է Գագիկ Ծառուկյանի նկատմամբ իրականացված գործողությունները՝՝ դրանք համադրելով իշխանությանը մոտ կանգնած գործարարների իրավիճակի հետ, որոնց նկատմամբ, ըստ նրա, կիրառվում են արտոնյալ պայմաններ։