Հարություն Կիվիրյանն ավարտել է Crew-13 առաքելության մարզումների փուլը

«Ռոսկոսմոս»-ի տիեզերագնաց և Crew-13 առաքելության պահեստային անդամ Հարություն Կիվիրյանը հաջողությամբ հանձնել է համալիր մարզումների քննությունը՝ ավարտելով նախապատրաստական վերջին փուլը։ Այս մասին հայտնել է Տիեզերագնացների մարզման կենտրոնը (CTC)։

Տիեզերագնացի խոսքով՝ մարզումները համակարգվում են «Ռոսկոսմոս»-ի և NASA-ի միջև, ինչի շնորհիվ դրանց փուլերն ու բովանդակությունը մեծապես համընկնում են։

Ռուսական անձնակազմի անդամները խորացված գիտելիքներ են ստանում Միջազգային տիեզերական կայանի (ՄՏԿ) ռուսական հատվածի համակարգերի վերաբերյալ։ Առանձնահատուկ ուշադրություն է դարձվում արտակարգ իրավիճակներին արձագանքելուն և ամերիկյան անձնակազմի հետ փոխգործակցությանը։

«Մեր կենտրոնում մարզումների ընթացքում ներառում ենք բոլոր հնարավոր արտակարգ իրավիճակները, ուստի ես պատրաստ եմ գործել տարբեր պայմաններում և ցանկացած տիեզերական համակարգով։ Ես չէի ցանկանա թռիչքի ընթացքում բախվել արտակարգ իրավիճակների, բայց մենք պատրաստ ենք դրանց»,- քննությունից առաջ նշել է Կիվիրյանը։