Մի բան է հայ ժողովրդի ընտրությունը, մեկ այլ բան՝ Փաշինյանի կամայական ընտրությունը. Պավել Դանիլին

Քաղաքագետ Պավել Դանիլինը Alpha News-ի հետ զրույցում մեկնաբանել է Հայաստանի և Ռուսաստանի առաջնորդների առաջիկա հանդիպումը, ինչպես նաև Եվրասիական տնտեսական միության (ԵԱՏՄ) կազմում Հայաստանի անդամակցությունը պահպանելու հնարավոր հանրաքվեն։

«Փաշինյանը մեկնում է Մոսկվա բավական լարված հարաբերությունների պայմաններում, ընդ որում՝ այնպիսի հարաբերությունների, որոնք նա ամեն օր ավելի է սրում։ Հայաստանում «Ռուսական երկաթուղիներ»-ի մասնաճյուղը բռնագրավելու գաղափարը մեզ մոտ, բնականաբար, միայն վրդովմունք է առաջացնում։ Այդ համակարգը ստեղծվել է հատուկ Հայաստանի համար, այն միշտ եղել է վնասաբեր, իսկ ներկայումս աշխատում է ժամացույցի պես։ Ինձ համար դժվար է պատկերացնել, թե ինչպես է այդ համակարգն աշխատելու այն դեպքում, եթե հանկարծ տեղի ունենա բռնագրավում։ Բայց ես մի բան հաստատ գիտեմ՝ եթե Փաշինյանը նման հարցով է այժմ մեկնում Մոսկվա, ապա նա այնտեղից ձեռնունայն է վերադառնալու», — ասել է Դանիլինը։

Փորձագետի կարծիքով՝ Ռուսաստանի ղեկավարությունը ցանկանում է հստակություն ստանալ Հայաստանի արտաքին քաղաքական վեկտորի վերաբերյալ։

«Ռուսաստանը հարց է դնում՝ որոշեք, թե որտեղ եք։ Երկու աթոռի վրա նստել չի ստացվի։ Ուստի Փաշինյանի ընտրությունը պարզ է. կամ նա հանրաքվե է անցկացնում, և այդ հանրաքվեում Հայաստանի ժողովուրդն ասում է. «Մենք ուզում ենք Եվրամիություն, այնտեղ մեզ ամեն տեսակ բարիքներ կտան, մենք այնտեղ կվաճառենք մեր ծիրանն ու իշխանը, իսկ Մոսկվան մեզ պետք չէ»… Լավ, դա հայ ժողովրդի ընտրությունն է։ Բայց եթե Փաշինյանը ցանկանում է իր սեփական որոշմամբ մեզնից հեռացնել բարեկամ, շատ առումներով եղբայրական ժողովրդի, դա սխալ մոտեցում է։

Եվ հենց այդ պատճառով էլ Վլադիմիր Պուտինը պնդում է հանրաքվեի անցկացման անհրաժեշտությունը։ Մի բան է հայ ժողովրդի ընտրությունը, մեկ այլ բան՝ Փաշինյանի կամայական ընտրությունը», — ընդգծել է քաղաքագետը։