Ֆրանսիայում թալանչիները ջարդուփշուր են արել «Մարսել» ֆուտբոլային ակումբի խանութը

Ֆրանսիայի Մարսել քաղաքում թալանչիները ջարդուփշուր են արել համանուն ֆուտբոլային ակումբի պաշտոնական խանութը, ինչի հետևանքով այն ստիպված են եղել ժամանակավորապես փակել։ Այս մասին հայտնում է «Մարսել» ֆուտբոլային ակումբի մամուլի ծառայությունը։

««Մարսել» ֆուտբոլային ակումբը վճռականորեն դատապարտում է բռնության և թալանի գործողությունները, որոնց թիրախ է դարձել Կանեբիեր փողոցում գտնվող մեր պաշտոնական խանութը։ Ակումբը համերաշխություն է հայտնում իր գործընկեր «Puma» ընկերությանը, որը ղեկավարում է խանութը։

Այս իրադարձությունները զգալի նյութական վնաս են պատճառել՝ ստիպելով ակումբին ժամանակավորապես փակել խանութը այցելուների համար։ Այնուամենայնիվ, երկրպագուները կարող են այցելել քաղաքի «Մարսել» ակումբի մյուս պաշտոնական խանութները», — ասվում է հայտարարության մեջ։
Faisons parler Marseille պորտալի հրապարակած կադրերում երևում է, թե ինչպես են թալանչիները կոտրում խանութի ցուցափեղկը և ներխուժում ներս։