Ուրուգվայի հայ համայնքը հանրահավաք կանցկացնի

Այս օրերին աշխարհի տարբեր երկրների հայ համայնքների ներկայացուցիչներ բողոքի ակցիաներ ու երթեր են անցկացնում՝ ահազանգելով Ադրբեջանի կողմից արցախահայերի նկատմամբ տարվող ցեղասպան գործողությունների մասին։

Այս շրջանակներում հոկտեմբերի 5-ին Ուրուգվայի հայ համայնքը հանրահավաք կանցկացնի Մոնտեվիդեոյում՝ Կանցլերի շենքի մոտ։ Հավաքի նպատակն է հայտարարել պետության մեջ մարդու իրավունքներին նվիրվածության բացակայության մասին այն պայմաններում, երբ Արցախում նոր ցեղասպանություն է իրականացվում։

Ցույցը կազմակերպվել է Ուրուգվայի երիտասարդ հայերի կողմից, որոնք ողջունում են, որ 1965 թվականին Ուրուգվայն առաջամարտիկ է եղել Հայոց ցեղասպանության ճանաչման գործում ամբողջ աշխարհում, մինչդեռ 2023 թվականին այդ երկիրն անտեսում է նշված ցեղասպանության շարունակությունը՝ խնդրելով զոհերին «չսրել իրավիճակը»։