ՀԱՊԿ-ից Հայաստանի դուրս գալը չի նպաստի նրա անվտանգության ամրապնդմանը. Ալեքսանդր Ասաֆով

Ռուս քաղաքագետ Ալեքսանդր Ասաֆովը Alpha News-ի հետ զրույցում մեկնաբանել է ՀԱՊԿ-ից Հայաստանի հավանական դուրս գալը:

«Հայաստանն, ամենայն հավանականությամբ, դուրս կգա ՀԱՊԿ-ից։ Այս հարցի վերաբերյալ կա ՀԱՊԿ ներկայիս նախագահի հայտարարությունը։ Ռուսաստանի և ՀԱՊԿ մյուս անդամների տեսանկյունից այս քայլը Հայաստանին թելադրված է արևմտյան գործընկերների կողմից։ Անշուշտ, դա չի նպաստում Հայաստանի անվտանգության հետագա ամրապնդմանը՝ չնայած ՆԱՏՕ-ի չափանիշներին համապատասխան զենքի մատակարարման, ամրապնդման և վերազինման մասին հավաստիացումներին։ Ինչպես կատակում են համացանցում, Փաշինյանը վարպետության դաս է ցուցադրում Ադրբեջանի տարածքի ընդլայնման վերաբերյալ», — նշել է Ասաֆովը։

Քաղաքագետի կարծիքով՝ Հայաստանի՝ Ռուսաստանի հետ ռազմաքաղաքական դաշինքից դուրս գալը հակաարդյունավետ է:

«Ինչ վերաբերում է Ռուսաստանի ուղեծրից հեռանալուն, ապա կա մի համառ բան, որը կոչվում է աշխարհագրություն։ Հնարավոր չէ էլիտաների քաղաքական հայացքներից ելնելով փոխել աշխարհագրությունը։ Հնարավոր չէ տեղափոխվել այլ մայրցամաք, դառնալ 51-րդ նահանգը և այլն: Աշխարհագրական, պատմական և այլ պատճառներով անհնար է դուրս գալ հարևան ուղեծրից: Հարցը վերաբերում է սառեցմանը, տարածաշրջանում լարվածությանը, բայց կարծում եմ, որ ժամանակը կկարգավորի այս իրավիճակը»,- եզրափակել է փորձագետը։