Բանակցային գործընթացի երկու կողմերն էլ չունեն հստակ դիրքորոշում և քաղաքական կամք. Դենիս Դենիսով

Քաղաքագետ, ՌԴ կառավարությանն առընթեր ֆինանսական համալսարանի փորձագետ Դենիս Դենիսովը Alpha News-ի եթերում մեկնաբանել է Հայաստանի և Ադրբեջանի միջև խաղաղության պայմանագրի ստորագրման հեռանկարը, Վրաստանի ղեկավարության մեղմ շրջադարձը ՌԴ-ի հետ ավելի կառուցողական երկխոսության ուղղությամբ և ճգնաժամը Ռուսաստանի և Աբխազիայի հարաբերություններում:

«Այս համաձայնագրի ստորագրման առանցքային խնդիրը Հայաստանի և Ադրբեջանի ղեկավարության քաղաքական կամքն է։ Եթե երկու կողմերն էլ ունենային հստակ դիրքորոշում և հստակ ցուցում, որ անհրաժեշտ է ինտենսիվացնել այս համաձայնագրի նախապատրաստման և ստորագրման գործընթացը, համաձայնագիրն արդեն ստորագրված կլիներ։Եվ այս առումով ինչ-որ սրացման և որոշ կետերի շուրջ անհամաձայնության հետ կապված լուրերը հենց վկայում են այն մասին, որ կողմերն իրենց համար որևէ օպտիմալ տարբերակ չեն տեսնում»,- ընդգծել է Դենիսովը։

Ինչ վերաբերում է Վրաստանին, ապա, ըստ փորձագետի, Վրաստանի ղեկավարության փափուկ շրջադարձը դեպի Ռուսաստանի հետ ավելի կառուցողական երկխոսություն աննկատ չի մնա Արևմուտքի երկրների կողմից։

«Սոցիոլոգիական հետազոտություններով, որոնք գտնվում են բաց տիրույթում, այժմ չափազանց դժվար է կանխատեսել, թե արդյոք իշխանական կուսակցությունը կմնա գոնե այն նույն իրավիճակում, որում գտնվում է հիմա՝ ունենալով բացարձակ մեծամասնություն։

Մենք բոլորս հիանալի հասկանում ենք, որ վրացական ղեկավարության նման փափուկ շրջադարձը դեպի Ռուսաստանի Դաշնության հետ ավելի կառուցողական երկխոսություն աննկատ չի մնում Արևմուտքի երկրների մոտ։ Եվ բնական է, որ նրանք իրենց հնարավորությունների ու ռեսուրսների միջոցով կփորձեն փոխել Վրաստանի ժողովրդի ընտրությունը»,- ասել է Դենիսովը։

Քաղաքագետը միաժամանակ նշել է, որ Ռուսաստանի և Աբխազիայի երկկողմ հարաբերությունները հերթական անգամ որոշակի անկում են ապրում։

«Աբխազա-ռուսական հարաբերությունների ճգնաժամը կապված է աբխազական ներքաղաքական ճգնաժամի հետ։ Մենք լավ գիտենք, որ Աբխազիան ավանդաբար կենտրոնանում է Մոսկվայի վրա թե՛ ներքին, թե՛ արտաքին քաղաքական հարցերում։ Բայց այս ամենը տեղի է ունենում ժամանակաշրջաններում: Այս իրավիճակը չի կարելի անվանել գծային: Վճարումների դադարեցման հետ կապված տվյալները վկայում են այն մասին, որ երկկողմ հարաբերությունները կրկին որոշակի անկում են ապրում։ Ինձ թվում է՝ հիմա Աբխազիայում կսկսվեն նախընտրական արշավները, իրավիճակը քիչ թե շատ կկայունանա, կհարթվի, և այդ հարցերն ուղղակի կհանվեն օրակարգից»,- եզրափակել է Դենիսովը։