Ադրբեջանը փորձեց ցույց տալ, որ Արցախում գազն անընդմեջ չէ, որ ընդհատված է. Մետաքսե Հակոբյան

Արցախի ԱԺ «Արդարություն» խմբակցության պատգամավոր Մետաքսե Հակոբյանի համոզմամբ՝ Ադրբեջանը Արցախում գազամատակարարման կարճատեւ վերականգնմամբ փորձեց ցույց տալ, որ Արցախում գազն անընդմեջ չէ, որ ընդհատված է: Alpha News-ի հետ զրույցում պատգամավորը կարծիք հայտնեց, որ Ադրբեջանն այդ քայլին գնացել է Արդարադատության միջազգային դատարանի՝ օրեր առաջ կայացրած որոշումից ելնելով, որով դատարանը միաձայն վերահաստատել էր փետրվարին կայացրած վճիռը՝ Ադրբեջանին պարտավորեցնելով ապահովել տեղաշարժը Լաչինի միջանցքով:

«Ադրբեջանը որոշել է ոչ թե ենթարկվել այդ որոշմանը, այլ փորձել է այդ քայլով ցույց տալ, որ Արցախում գազամատակարարումն անընդմեջ չէ, որ ընդհատված է: Եվ եթե մենք օրեր առաջ ասում էինք, որ հանրագումարային՝ շուրջ 150 օր է, որ գազ չկա Արցախում, ապա իրենք հիմա կարող են նոր հաշվարկ սկսել:

Իրենք պրիմիտիվ խորամանկություն արեցին ու ցույց տվեցին, որ այլ պատճառով է դադարեցված եղել գազամատակարարումը, հատկապես, երբ երեկ ադրբեջանական մեդիան տարածում էր, թե Ադրբեջանը չէ, որ անջատել է Արցախի գազամատակարարումը, այլ Հայաստանից է այն դադարեցված: Ստացվեց, որ Ադրբեջանը կատարեց Արդարադատության միջազգային դատարանի որոշման մի մասը, բայց միեւնույն ժամանակ, նոր խնդիր առաջացավ: Այսինքն՝ նման դատական պրոցեսները միջազգային հարթակներում կարող են անդադար լինել, բայց կարճաժամկետ կամ էլ աննշան հաջողություններ գրանցել, որոնք, էստ էության, որեւէ բան չեն փոխում»,- ընդգծեց Մետաքսե Հակոբյանը:

Արցախցի պաշտոնյայի խոսքով՝ գազամատակարարման վերականգնմամբ Արցախում ավելի շատ անհանգստացան, քան ոգեւորվեցին:

«Գազամատակարարման կարճատեւ վերականգմամբ պայմանավորված, Արցախում ոգեւորություն չի եղել: Միամտություն կլիներ մտածել, որ Ադրբեջանը կարող է իր ագրեսիան թուլացնել կամ էլ փոխել իր գործելաոճը»,- ասաց Մետաքսե Հակոբյանը:

Հիշեցնենք՝ «Արցախգազ»-ի փոխանցմամբ՝ հուլիսի 8-ի երեկոյան Հայաստանից Արցախ գազամատակարարումն Ադրբեջանը վերականգնել էր: Արցախում ադրբեջանական կողմը գազամատակարարումը դադարեցրել էր մարտի 21-ից:

Հաղորդվեց, որ արցախյան կողմի հետ այդ թեմայով որեւէ հաղորդակցություն տեղի չի ունեցել: Ժամեր անց, սակայն, Ադրբեջանը նորից անջատեց գազամատակարարումը:

Հիշեցնենք, որ Արցախի շրջափակման 210 օրվա ընթացքում արդեն 181 օր շարունակ խափանված է Հայաստանից Արցախ էլեկտրամատակարարումը, իսկ գազամատակարարումը, հանրագումարային, 143 օր շարունակ: