Աիդա Ավետիսյան. Խորհրդային և հայ քիմիկոսը

Alpha News-ը շարունակում է ներկայացնել «Ալֆա պերսոնա» շարքը:

Խորհրդային և հայ քիմիկոս, Օրգանական քիմիայի բնագավառի մասնագետ, քիմիական գիտությունների դոկտոր, պրոֆեսոր, ԵՊՀ քիմիայի ֆակուլտետի դեկան Աիդա Ավետիսյանը ծնվել է 1938թ. դեկտեմբերի 10-ին Երևանում:

Մինչև 1960թ. սովորել է ԵՊՀ Քիմիայի ֆակուլտետում, որն ավարտել է գերազանցությամբ: Հետագայում սովորել է Ն. Դ. Զելինսկու անվան Օրգանական քիմիայի ինստիտուտի ասպիրանտուրայում։

Ավետիսյանն աշխատել է Երևանի պետական համալսարանում որպես ասիստենտ, ավագ դասախոս, դոցենտ և Օրգանական քիմիայի ամբիոնի պրոֆեսոր: 1979-2000 թվականներին եղել է Օրգանական քիմիայի ամբիոնի վարիչ, 1985 թվականից զուգահեռ՝ ԵՊՀ քիմիայի ֆակուլտետի դեկան և գիտական խորհրդի նախագահ:

Աիդա Ավետիսովնան մասնակցել է նաև քիմիայի հարցերին նվիրված բազմաթիվ միջազգային գիտաժողովների այնպիսի քաղաքներում, ինչպիսիք են Բրյուսելը, Մադրիդը, Բրատիսլավան, Մոսկվան և Փարիզը:

Ավետիսյանի հիմնական գիտամանկավարժական գործունեությունը կապված էր Նոր կենսաբանորեն ակտիվ և հետերոցիկլիկ միացությունների S-, O- և N պարունակող սինթեզի մեթոդների մշակման և այդ միացությունների հատկություն-կառուցվածք փոխկապակցվածության բնագավառում կատարված հետազոտությունների հետ:

1976 թվականին նրան շնորհվել է պրոֆեսորի գիտական կոչում։ Աիդա Ավետիսյանն ընտրվել է ՀՀ ԳԱԱ բնական գիտությունների բաժանմունքի իսկական անդամ: Ավետիսյանը նաև գրել է ավելի քան չորս հարյուր գիտական աշխատություններ, այդ թվում՝ մենագրություններ, և ստացել գյուտերի շուրջ հարյուր վկայական։

Պրոֆեսորը կյանքից հեռացել է 2009 թվականի հոկտեմբերի 19-ին: