Ամերիկայի հայ դատի հանձնախումբը Կոնգրեսի 80-ից ավելի գրասենյակների ներկայացրել է Արցախում տիրող հումանիտար ճգնաժամը
26 Սեպտեմբերի 2023, 12:45
Ամերիկայի Հայ դատի հանձնախումբը առցանց լսումների ընթացքում Կոնգրեսի ավելի քան 80 գրասենյակների ներկայացրել է Արցախում տիրող ծայրահեղ ծանր իրավիճակը, որը ստեղծվել է Ադրբեջանի կողմից սեպտեմբերի 19-ին իրականացված լայնածավալ հարձակման, դրան նախորդող ավելի քան 9 ամիսների շրջափակման, ինչպես նաև` Արցախում վառելիքի պահեստում տեղի ունեցած ուժգին պայթյունի հետևանքով։ Այս մասին տեղեկանում ենք Ամերիկայի Հայ դատի հանձնախմբի տարածած հայտարարությունից:
Քննարկումը վարել է Ամերիկայի Հայ դատի հանձնախմբի՝ կառավարության հետ կապերի հարցերով տնօրեն Թերեզա Երիմյանը, տեղում իրավիճակը ներկայացրել են Արցախի ներկայացուցիչները։
Հանձնախումբն արձանագրում է, որ չնայած Կոնգրեսի անդամների, ամերիկահայ համայնքի, իրավապաշտպան տարբեր կազմակերպությունների բազմաթիվ կոչերին, վերջին երեք տարիների ընթացքում ԱՄՆ նախագահ Ջո Բայդենի վարչակազմը հրաժարվել է հումանիտար օգնություն ուղարկել Արցախ, սակայն շարունակել է ռազմական աջակցությունն Ադրբեջանին։
Լսումների ընթացքում Ամերիկայի Հայ դատի հանձնախումբը կոչ է արել ամերիկյան և միջազգային դիտորդական առաքելություն տեղակայել «Արցախում և դեպի Հայաստան մարդասիրական միջանցքի երկայնքով՝ ապահովելու հայ բնակչության անվտանգությունը Ադրբեջանի հետագա ագրեսիայից»։
Կոչ է արվել նաև արգելափակել ռազմական աջակցությունն Ադրբեջանին, ինչպես նաև պատժամիջոցներ սահմանել Բաքվի նկատմամբ Արցախի բնիկ հայ բնակչության նկատմամբ հարձակման և ցեղասպանական գործողությունների համար։
Հիմա եթերում
