ԱՄՆ-ն փորձելու է չեզոքացնել իրանական նավթի վաճառքի զարտուղի ճանապարհները. Արամ Շահնազարյան
06 Փետրվարի 2025, 21:30
ԱՄՆ նորընտիր նախագահ Դոնալդ Թրամփը հրամանագիր է ստորագրել Իրանի հանդեպ առավելագույն ճնշում գործադրելու մասին: Մասնավորապես՝ Թրամփը մտադիր է իրանական նավթի արտահանումը զրոյականի հասցնել։ Թեմայի վերաբերյալ Alpha News-ը զրուցել է «ԱԼԻՔ» օրաթերթի գլխավոր խմբագիր Արամ Շահնազարյանի հետ:
Նա նշել է, որ Դոնալդ Թրամթն իր նախագահության առաջին իսկ շրջանում այս որոշումը կայացրել էր, և դա մեծ հարված է հասցրել Իրանի թե՛ նավթի արտահանմանը, թե՛ տնտեսությանը:
«Սակայն Իրանն արդեն գիտի, թե ինչպես պետք է վարվի, այլ կերպ ասած՝ Իրանը համակերպվեց պատժամիջոցների հետ: Նա իր տնտեսությունը տարել է այն ուղղությամբ, որ հնարավորինս նվազագույն կախվածություն ունենա նավթի արտահանումից, քանի որ, ինչպես գիտենք, Իրանի տնտեսության հիմնական անկյունաքարը հենց նավթի արտահանումն է: Նույնը տեղի կունենա այս հրամանագրի արդյունքում: Ճնշումները կավելանան, Թրամփը կփորձի զրոյականի հասցնել Իրանի նավթային արտահանումները: Հաշվի առնելով այն հանգամանքը, որ նրանք գիտեն, թե մոտավորապես ինչպես է շրջանցում Իրանը պատժամիջոցները, կփորձեն այդ ուղիները ևս չեզոքացնել: Բնականաբար, Իրանը կփորձի գտնել այլ ուղիներ: Թրամփի նախորդ պաշտոնավարմանը Իրանը կորցրել է իր հիմնական գնորդներին և հիմա սահմանափակվում է հիմնականում Չինաստանի հետ նավթի վաճառքով: Առաջիկայում շատ բարդ խաղ է սպասվում: Մենք նույն սցենարի ականատեսն ենք լինելու՝ փոքր-ինչ տարբեր բովանդակությամբ»,- ասել է Շահնազարյանը:
Նա ընդգծել է, որ նման սպառնալիքները թրամփյան յուրահատուկ ոճ է, և նույնն անում է, օրինակ, Կանադայի, Մեքսիկայի հետ:
«Իրանին ուղղված սպառնալիքները թրամփյան յուրահատուկ ոճ է: Նա նույնն անում է Կանադայի, Մեքսիկայի հետ, նույնը փորձում է անել Չինաստանի հետ, անգամ Ռուսաստանի հետ, նույնիսկ այն պարագայում, որ Պուտինի հետ անձնական շատ լավ հարաբերություններ ունի: Թե ինչքանով նա կհաջողի, դեռ հարց է: Պետք է մի քանի բան նկատի ունենալ: Նախ Իրանը բազմիցս հայտարարել է, որ իր ատոմային ծրագիրը կրում է բացառապես խաղաղասիրական միտումներ, երկրորդ՝ այս տարիների ընթացքում չի եղել մի իրեղեն ապացույց, որ Իրանը ձգտում է միջուկային զենք ձեռք բերել: Բայց այստեղ հարց է առաջանում՝ հնարավո՞ր է արդյոք ոչնչացնել Իրանի միջուկային ծրագիրը: Այս հարցի մասին խոսելիս պետք է նշել, որ միգուցե ինչ-որ բաներ ստիպեն, որ այդ ծրագրի ընթացքը դանդաղանա, թեկուզ ժամանակավոր դադարեցվի, բայց այն ամբողջովին տեղայնացված է և հիմնված է իրանցի գիտնականների կարողությունների, փորձի վրա, և եթե ինչ-որ պահի կասեցվի, նրանք կվերականգնեն դա: Իսկ եթե խոսենք Իրանի ատոմային կենտրոններին հարվածելու մասին՝ ապա պետք է նշեմ, որ դրանք գտնվում են տարբեր տեղերում, շատ լավ պաշտպանված են և հեշտ չի լինի հարվածել»,- եզրափակել է Շահնազարյանը:
Հիմա եթերում
