ԱՄՆ-ում կանցկացվեն Հայոց ցեղասպանության 110-րդ տարելիցին նվիրված միջոցառումներ. Հարութ Սասունյան

Ապրիլի 24-ին նախաձեռնել ենք հավաքվել Միացյալ Նահանգներում Թուրքիայի հյուպատոսարանի առաջ: Այս մասին Alpha News-ի հետ զրույցում ասել է «Կալիֆորնիա Կուրիեր» թերթի խմբագիր և հրատարակիչ Հարութ Սասունյանը։

«Այս տարի ապրիլի 24-ին Հայոց ցեղասպանության 110-րդ տարելիցն է, և աշխարհի գրեթե բոլոր երկրներում այդ օրը հարգանքի տուրք են մատուցում Հայոց ցեղասպանության զոհերի հիշատակին։ Ինչպես նախորդ տարիներին, այս տարի ևս նախաձեռնել ենք ապրիլի 24-ին հավաքվել Միացյալ Նահանգներում Թուրքիայի հյուպատոսարանի առաջ: Երկրորդ կարևոր միջոցառումը տեղի է ունենալու Մոնթեբելո քաղաքում, որտեղ կա Ցեղասպանության զոհերին նվիրված մեծ հուշակոթող: Ի դեպ հուշակոթողը կանգնեցվել է մոտ 50 տարի առաջ ԱՄՆ-ի պետական հողի վրա, ինչը բացառիկ է: Ես միշտ այս օրերին գնում եմ տարբեր երկրներ՝ խոսելու Հայոց ցեղասպանության մասին: Այս տարին ևս բացառություն չէ, իսկ ապրիլի 6-7-ին կլինեմ Բոստոնում, որտեղ կխոսեմ ՄԱԿ-ի կողմից Հայոց ցեղասպանության ընդունման մասին»,- նշել է Սասունյանը:

Նա իր խոսքում ընդգծել է, որ Հայոց ցեղասպանության ճանաչման հարցում մեծ է նաև Սփյուռքի դերը:

«Մենք տասնամյակներ շարունակ խոսում ենք ցեղասպանության մասին, ինչը թույլ չի տալիս աշխարհին մոռանալ, թե թուրքերը ոնց են վարվել հայերի հետ: 30-ից ավելի երկրներ ճանաչել են Հայոց ցեղասպանությունը և սա նաև Սփյուռքի կատարած աշխատանքի արդյունքն է: Մենք երկար տարիներ աշխատել ենք, որ ԱՄՆ-ն ևս ճանաչի Հայոց ցեղասպանությունը, և 2021 թ-ին Բայդենը ճանաչեց այն: Նաև ԱՄՆ կոնգրեսը 4 տարբեր տարիների բանաձևեր է ընդունել, որտեղ հիշատակումներ կան Հայոց ցեղասպանության մասին: Իսկ այն երկրները, որոնք դեռևս չեն ճանաչել Ցեղասպանությունը, ոչ թե չեն հավատում, որ ցեղասպանություն է եղել, այլ քաղաքական հաշիվներ ունեն Թուրքիայի հետ և չեն ցանկանում հարաբերությունները փչացնել»,- եզրափակել է Սասունյանը: