Անցումային կառավարությունը պետք է կազմակերպի արտահերթ կամ հերթական ընտրություններ. Բագրատ Սրբազան

Հանրապետության հրապարակում ՀԱԵ Տավուշի թեմի առաջմորդ Բագրատ արքեպիսկոպոս Գալստանյանի գլխավորած համազգային հանրահավաքի ժամանակ Սրբազանն ազդարարեց շարժման երրորդ ու վճռական փուլի մասին, որի հանգուցալուծումն, ըստ Բագրատ արքեպիսկոպոսի՝ ճշմարտության հաղթանակն է:

«Դուք անընդահատ կոնկրետություն ենք պահանջել, դուք անընդհատ պահանջել եք նոր կառավարության վարչապետի թեկնածուի ու օրակարգի մասին: Ինչպես նշել եմ նախորդ անգամ՝ այդ թեկնածուն պետք է լինի վերկուսակցական, չի կարող լինել որևէ կուսակցության կամ խմբակի անդամ: Նա պետք է ձևավորի անցումային կառավարություն, որը կլինի հաշտության կառավարություն»,- հայտարարեց Սրբազանն, ապա շարունակելով ելույթն՝ ասաց, որ անցումային կառավարության օրակարգում պետք է երեք ուղղություն լինի, առաջինը՝ ներքին հաշտություն, որը նրա խոսքով՝ պետք է հիմնված լինի արդարության և արդարադատության վրա, երկրորդը՝ արտաքին հարաբերություններ, որն ըստ Սրբազանի՝ պետք է վարել այնպես, որպեսզի սառեցվի այն իրավիճակը, որում հիմա կանք, և երրորդ ուղղությունը՝ կազմակերպել արտահերթ կամ հերթական ընտրություններ, սակայն պայմանով, որ անցումային կառավարությունը հավակնություն չի ունենա մասնակցել այդ ընտրություններին: