Անհնար է ծառայել երկու Աստծու. Միխայիլ Բելյաևը՝ Հայաստանի եվրաինտեգրման մասին
14 Ապրիլի 2025, 21:30
Տնտեսական գիտությունների թեկնածու, տնտեսագետ, «Ֆինանսական գրագիտության զարգացման ասոցիացիայի» փորձագետ Միխայիլ Բելյաևը Alpha News-ին մեկնաբանել է ՌԴ ԱԳՆ ղեկավարի տեղակալ Միխայիլ Գալուզինի այն հայտարարությունը, թե ՌԴ-ն մտադիր չէ ոտնահարել Հայաստանի շահերը Եվրասիական տնտեսական միությունում (ԵԱՏՄ) իր եվրոպական կուրսի պատճառով, սակայն միությունից դուրս գալը ցավոտ կլինի երկրի բնակչության համար։
Փորձագետի կարծիքով՝ Հայաստանը պետք է ընտրություն կատարի՝ կամ լինի Եվրամիության անդամ, կամ շարունակի հարաբերությունները Ռուսաստանի հետ։
«Անհնար է ծառայել երկու Աստծու։ Կամ դու մտնում ես Եվրոպական Միության կազմի մեջ, ենթարկվում ես նրանց բոլոր կանոններին և բոլոր կարգավորումներին, որոնք առանձնապես բարեկամական չեն Ռուսաստանի նկատմամբ, և Հայաստանը պետք է ենթարկվի այդ բոլոր կանոններին։ Կամ հակառակը՝ պետք է հրաժարվել ԵՄ-ին անդամակցելուց և այդ ժամանակ արդեն շարունակել հարաբերությունները Ռուսաստանի հետ, բայց ինձ թվում է՝ ավելի արտոնյալ և հարմար պայմաններով:
Հայաստանն առայժմ այլ ճանապարհ է ընտրել, բայց մենք չենք միջամտելու, սա իր ընտրությունն է, սա երկրի ընտրությունն է, բայց, իմ կարծիքով, դա ամենախելամիտը չէ։ Ամեն դեպքում, Հայաստանը հիմա Ռուսաստանից որևէ արտոնություններ կամ զիջումներ պետք է չսպասի, քանի որ տեղափոխվում է այլ ճամբար և ենթարկվելու է այլ կանոնների, այլ կանոնակարգերի»,- ասել է Բելյաևը։
Նա միաժամանակ նշել է, որ Հայաստանը դեռևս չի ստացել ոչ բարեկամական երկրի կարգավիճակ․ «Ուստի հարաբերությունները կլինեն չեզոք, ինչպես բոլոր երկրների հետ, միանգամայն նորմալ ռեժիմում՝ առանց հատուկ արտոնությունների, որոնք վերաբերում են ԵվրԱզԷՍ-ի երկրներին կամ ռուսական այլ միավորումներին, որոնց հետ ավելի բարեկամական և սերտ կապեր կան»,- եզրափակել է Բելյաևը։
Հիմա եթերում
