Աննա Մելիքյանը կնկարահանի «Դիվա» ֆիլմը

Մ. Գորկու անվան կինոստուդիան ներկայացրել է «Դիվա» ֆիլմը, որի ռեժիսորը կլինի Աննա Մելիքյանը:

Սա տրագիկոմեդիա է կախարդական ձայնով հրաշամանուկ աղջկա մասին, ով 11 տարեկանում դառնում է երկրի գլխավոր օպերային թատրոնի աստղը։ Երկու նախանձ օպերային դիվաներ, որոնցից Մայան վերցրել է բոլոր հիմնական դերերը, որոշում են ազատվել բնության հրաշքից։ Աղջիկը մահանում է հենց բեմի վրա, բայց մնում է թատրոնում որպես ուրվական:

Նախագիծը նկարահանվում է «Մարս Մեդիա»-ի հետ համատեղ։ Բեմադրիչի խոսքով՝ ֆիլմում կհնչեն օպերային հիթեր։ Գլխավոր հերոսուհու դերակատարն արդեն հայտնի է, սակայն նրա անունը դեռ չի բացահայտվում։

Ֆիլմի նկարահանումները տեղի կունենան Սանկտ Պետերբուրգում և Մոսկվայում: Հիմնական վայրը պետք է լինի Մեծ թատրոնի պատմական բեմը, և այժմ բանակցություններ են ընթանում այդ ուղղությամբ։