Արցախի հարցում լավատեսական տարբեր հայտարարությունները զարմանք են հարուցում. Տիգրան Գրիգորյան
21 Հունիսի 2023, 18:05
«Ալիևը շատ լավ է հասկանում, որ միջազգային հանրության դերը թուլացել է ամբողջ աշխարհում: Նա պարզապես փորձում է գետնի վրա հասնել արդյունքի»,- ասում է «ժողովրդավարության և անվտանգության տարածաշրջանային կենտրոնի» ղեկավար Տիգրան Գրիգորյանը՝ անդրադառնալով Արցախը Հայաստանին կապող ճանապարհի տոտալ արգելափակմանը:
Գրիգորյանն ընդգծում է՝ Ադրբեջանն էլ է հասկանում, որ եթե չլիներ ռուս-ուկրաինական պատերազմը՝ Բաքուն չէր կարողանա հասնել այդ արդյունքներին:
Փորձագետի խոսքով՝ միջազգային հանրությունը պետք է առնվազն Արցախի շրջափակմանը մասնակցող ադրբեջանցիների դեմ պատժամիջոցներ կիրառի:
«Լեռնային Ղարաբաղում շուտով կարող է լինել էներգետիկ կոլապս Սարսանգի ջրամբարի չորացման պատճառով: Այն հանգամանքը, որ Հայաստանի և Արցախի միջև արդեն յոթ օր է ընդհանրապես ապրանքաշրջանառություն չկա, և այն փաստը, որ Ադրբեջանը շարունակում է խախտել հրադադարի ռեժիմը, միջազգայնորեն ճանաչված նոյեմբերի 9-ի համաձայնագիրը, քաղաքական կամքի առկայության դեպքում պատժամիջոցների կիրառման համար բավարար են», — ընգծում է Գրիգորյանը:
Տիգրան Գրիգորյանի խոսքով՝ Արևմուտքը կարծես ցույց է տալիս, որ իր համար Արցախի հարցում կարմիր գիծը արյունահեղություն թույլ չտալն է:
«Բայց այստեղ ևս վստահություն չկա, որ այդ դեպքում էլ կոնկրետ քայլեր կձեռնարկվեն»,- արձանագրում է Գրիգորյանը, և հավելում՝ վստահություն չկա նաև Ռուսաստանի դեպքում: