Արցախում ապրելը երազանք էր. սիրիահայ բուժքույր
16 Սեպտեմբերի 2023, 23:40
![](https://media.alphanews.am/wp-content/uploads/2023/09/16162016/b398022a93a3343c92450dd2f8b30740_XL.jpg)
Արցախի շրջափակումը փոխել է Շուշիի շրջանում ապրող մարդկանց կենսակերպը: Այդուհանդերձ, շրջանի ոչ մի բնակիչ, առ այսօր, գյուղը լքելու ցանկություն չի հայտնել:
«Գյուղը դեռ կիսված ընտանիքներ ունի. մի մասը գտնվում է ՀՀ-ում, մյուս մասը՝ Ստեփանակերտում: Օրինակ, Սուրեն պապը գնացել էր Երևան՝ բժշկի, բայց չկարողացավ վերադառնալ, Գեղամի կինն էլ մնաց Երևանում: Կան ուսանողներ, որոնք այդպես էլ չկարողացան Ստեփանակերտ հասնել: Ունենք բնակիչներ, որոնք եկել էին Գորիսից, սակայն շրջափակման պատճառով մնացին մեզ մոտ: Ընտանիք ենք դարձել: Մի կտոր հացն էլ փշուր-փշուր բաժանում ենք մարդկանց»,- Artsakhtert—ի հետ զրույցում ասել է Շուշիի շրջանի Մեծ շեն բնակավայրի բուժքույր Սևան Մանջիկյանը:
— Տիկին Սևան, ի՞նչ կա այսօր գյուղացիների սեղանին:
-Փառք Աստծո՛: Հիմա ուտում ենք այն, ինչ ցանել ենք: Աչքներս չորս արած հետևում ենք իրադարձություններին՝ մի ճանապարհ բացվի` մեր այգու բարիքներից հասցնենք քաղաքին: Գյուղում ապրողը շատ, թե քիչ՝ կդիմանա, իսկ բարձրահարկ շենքում ապրողը…
![](https://artsakhtert.am/hy/images/2023/377413204_853807702537109_7488306035581816329_n.jpg)
Սևան Մանջիկյանը ծնվել ու մեծացել է Սիրիայում: Մայրը՝ Խարբերդից է, հայրը՝ Քեսաբից: Արմատներով սասունցի սիրիահայն ամուսնացել է ամերիկահայ Կարապետ Ափելյանի հետ: Մի քանի տարի ապրել են Սիրիայում և 2019 թվականին աղջկա՝ Մարալի հետ, տեղափոխվել Երևան: Սակայն, Արցախում ապրելը ընտանիքի համար վաղուց երազանք էր: 2020 թվականի պատերազմի ժամանակ աշխատում էր Երևանի հիվանդանոցներից մեկում, անդամագրվեց որպես կամավոր բուժքույր, բայց Արցախ հասնել էլի չհաջողվեց: Վերադարձավ պատերազմից մեկ տարի անց:
«Արցախից մեր ընկեր ամերիկահայ Շանթը զանգեց ու ասաց՝ Սևա՛ն, լեռների մեջ սահմանմերձ փոքր գյուղ կա, բուժքրոջ կարիք ունեն: Առանց երկմտելու 2021 թվականի օգոստոսին ընտանիքով տեղափոխվեցինք Շուշիի շրջանի Մեծ շեն գյուղ: Մինչև այսօր այստեղ ենք ու չենք էլ մտածում հեռանալու մասին»,-պատմում է բուժքույրը:
![](https://artsakhtert.am/hy/images/2023/377124559_1745574239203670_6722928163306870636_n.jpg)
![](https://artsakhtert.am/hy/images/2023/july/377478879_1868121200257360_8195452848516533436_n.jpg)
Ինչպես Արցախի յուրաքանչյուր բնակավայրում, Մեծ շենում էլ սուրճ, աղ, լվացքի փոշի պատրաստելու հնարը գտել են: Այստեղ նույնիսկ խակ խաղողից կիտրոնահյութի նման մի բան են պատրաստել: Սևանն իր փորձով է կիսվել, իսկ տեղացիներից էլ շատ բան է սովորել. «Ես չգիտեի ժենգյալով հաց թխելը, չգիտեի՝ ինչ է ղափաման կամ ինչպես են պատրաստում հայկական խաշլաման»:
— Երբևէ զղջացե՞լ եք վերադաձի համար:
-Ո՛չ, երազանք էր Արցախում ապրելը:
-Ի՞նչ տվեց Արցախը Սևան Մանջիկյանին:
— Տուն: Ես արցախցիներին շատ եմ սիրում:
![](https://artsakhtert.am/hy/images/2023/july/377149164_326327796453400_1343687906593417364_n.jpg)