Արման Ծառուկյան․ մարտիկների նոր սերնդի ձայնը

Արման Ծառուկյանը ծնվել է 1996 թ․ հոկտեմբերի 11-ին Վրաստանի Ախալքալաք քաղաքում, հայկական ընտանիքում։ Ընտանիքը տեղափոխվել է Սոչի, որտեղ Արմանը սկսել է զբաղվել սպորտով՝ նախ ըմբշամարտով, այնուհետև՝ թայլանդական բռնցքամարտով, իսկ ավելի ուշ՝ խառը մենամարտերով։ Արդեն պատանեկան տարիքում նա դրսևորել է իրեն որպես կարգապահ և նպատակասլաց մարզիկ՝ հաղթելով տարածաշրջանային մրցաշարերում և ձգտելով միջազգային մակարդակի։

Ծառուկյանն իր պրոֆեսիոնալ կարիերան սկսել է 2015 թվականին։ Նրա դեբյուտը UFC-ում տեղի է ունեցել 2019 թվականին՝ թեթև քաշային կարգի մարտիկներից մեկի՝ Իսլամ Մախաչևի դեմ։ Չնայած պարտությանը՝ Արմանը ուժեղ տպավորություն է թողել․ սա Մախաչևի համար կարիերայի ամենածանր մենամարտերից մեկն էր։ Այդ պահից ի վեր Ծառուկյանը բարձրացրել է վարկանիշը՝ ցուցադրելով բացառիկ ըմբշամարտ, դիմացկունություն և տեխնիկական բազմակողմանիություն։

Հետաքրքիր փաստ. Արմանն ազատ տիրապետում է հայերենին, ռուսերենին և անգլերենին, ակտիվ շփվում է երկրպագուների հետ և վարում է սոցիալական ցանցեր, որտեղ կիսվում է մարզումներով և մարտիկի կյանքով։ Նա մարզվում է Ռուսաստանի և ԱՄՆ-ի լավագույն մարզադահլիճներում, ներառյալ American Top Team-ը, և համարվում է դիվիզիոնի ամենահեռանկարային մարտիկներից մեկը։

2025 թ․ ապրիլին Ծառուկյանը UFC 300 հոբելյանական մրցաշարում կարևորագույն հաղթանակ տարավ UFC-ի նախկին չեմպիոն Չարլզ Օլիվեյրայի նկատմամբ։ Իսկ նոյեմբերին նրան Կատարում սպասվում է մենամարտ Դեն Հուկերի հետ։ Այս մենամարտը կարող է դառնալ տիտղոսային մենամարտի ուղեգիր։ Արմանը չի թաքցնում իր նպատակը. նա ցանկանում է հանդիպել գործող չեմպիոն Իլիա Տոպուրիայի հետ և ապացուցել, որ հենց ինքն է արժանի գոտուն։

Ծառուկյանը հայկական սպորտի նոր դեմքն է համաշխարհային ասպարեզում։ Նա իր մեջ համատեղում է ուժը, ինտելեկտը և ռազմավարությունը, մնալով միաժամանակ համեստ և ազնիվ մարտիկ։ Նրա ուղին պատմություն է այն մասին, թե ինչպես տոկունությունը, կարգապահությունը և ազգային հպարտությունը կարող են հասցնել համաշխարհային սպորտի գագաթնակետին։

Այսօր Արման Ծառուկյանը UFC-ի տիտղոսի գլխավոր հավակնորդներից է։ Եվ ММА-ում ավելի ու ավելի շատ ձայներ ասում են՝ եկել է նրա ժամանակը։