Արտո Թունջբոյաջյան. «Գրեմմի»-ի մրցանակակիր մուլտինստրումենտալիստ հայը

Արտո Թունջբոյաջյանը հայտնի կոմպոզիտոր, երգիչ, մուլտինստրումենտալիստ է, «ավանգարդ ֆոլկ» հեղինակային երաժշտական ուղղության հիմնադիրը:

Արտոն ծագումով հայ է, ծնվել է Թուրքիայի Ստամբուլ քաղաքում 1957 թվականին։

Մանուկ հասակից Թունջբոյաջյանը սիրահարված է եղել երաժշտությանը և նոտաներին։ Որպես երաժիշտ` նրա կայացման գործում զգալի դեր է խաղացել Արտոյի եղբայրը՝ հայտնի կոմպոզիտոր և երաժիշտ Օննո Թունչը։ Հենց նա դարձավ Արտոյի առաջին ուսուցիչը, առաջին ընկերը և մոտիվատորը։

Իր նպատակին հասնելու համար 1981 թվականին Թունջբոյաջյանը տեղափոխվել է Ամերիկա։ Նա նախ որոշել է ամբողջովին փոխել իր կյանքը, ինչպես նաև երաժշտությանը նոր հնչեղություն հաղորդել։

Ամերիկայում երաժիշտը համագործակցել և ձայնագրվել է այնպիսի հայտնի ջազի գուրուների հետ, ինչպիսիք են Չեթ Բեյքերը, Ալ դի Մեոլան և Ջո Զավինուլը, ինչպես նաև Փոլ Ուինթերի և «Earth Band»-ի հետ։ Նա նաև համագործակցել է թուրք հայտնի երգչուհի Սեզեն Աքսուի և հույն երգչուհի Էլեֆերիա Արվանիտակիի հետ։ Արտոն ստեղծել է նաև իր սեփական Armenian Navy Band խումբը։

1998 թվականին նրա Armenian Navy Band խումբը թողարկել է առաջին ալբոմը, որը կոչվում էր Bzdik Zinvor, որը նշանակում է «փոքրիկ զինվոր»։ Դրանից հետո, արդեն հայտնի խումբը, 1999 թվականին սկսել է ամենամյա հյուրախաղեր անցկացնել Եվրոպայում։ Խումբը ելույթ է ունեցել ամբողջ աշխարհում՝ ամեն անգամ բազմապատկելով հավատարիմ երկրպագուների թիվը։

2006 թվականին արժանացել է BBC Radio 3 Awards for World Music մրցանակին։

Նույնիսկ որոշակի ներդրում է կատարել կինոյում։ 2008 թվականին ստեղծել է «Պլատոն» ֆիլմի սաունդթրեքը։ Իսկ 2011 թվականին ձայնագրել է հայկական առաջին ինտերակտիվ «ԱլաԲալաՆիցա» ֆիլմի գլխավոր թեման։

2011 թվականին Արտո Թունջբոյաջյանն արժանացել է «Գրեմմի» մրցանակի՝ իր աշխատանքի և ստեղծագործական մեծ ավանդի համար: