Աթենքում ցույց անող դիմակավորված անձինք կապ չունեն շարքային քաղաքացիների հետ. Էքիզյան

Աթենքի կենտրոնական Սինտագմա հրապարակում օրեր առաջ զանգվածային բողոքի ցույցեր են անցկացվել՝ նվիրված 57 մարդու կյանք խլած երկաթուղային վթարի երկրորդ տարելիցին։

Վթարը տեղի էր ունեցել 2023 թվականին. Աթենք-Սալոնիկ արագընթաց ուղևորատար գնացքը Տեմպի քաղաքում բախվել էր բեռնատար գնացքի։ Վթարի հետևանքով մահացել էր 57 մարդ, մեծ մասը` ուսանողներ, 81 մարդ ստացել էր լուրջ, 99-ը՝ թեթև վնասվածքներ:

Ցույցերը ցրելու համար ոստիկանությունը արցունքաբեր գազ է կիրառել, որին նախորդել են լուսաձայնային նռնակների պայթյուններ։ Արցունքաբեր գազի կիրառումից հետո մի խումբ ցուցարարներ սկսել են շնչահեղձ լինել և հեռանալ տարածքից։ Ցուցարարների մի մասը, սակայն, մնացել է տեղում, նրանցից ոմանք տարբեր առարկաներ են նետել ոստիկանների ուղղությամբ։
Ակցիայի մասնակիցներն արդարադատություն ու ողբերգության պատճառների լիարժեք հետաքննությունն են պահանջում։

Թեմայի վերաբերյալ Alpha News-ը զրուցել է Հունաստանի «Ազատ օր» թերթի գլխավոր խմբագիր Քերոբ Էքիզյանի հետ:

«Շատ հայեր էլ են գնացել ու իրենց զորակցությունը հայտնել: Մենք այս երկրի քաղաքացիներ ենք, ունենք նույն իրավունքներն ու պարտավորությունները, ինչ ունեն հույն քաղաքացիները: Այս բախումները, որ տեսանք, ցույց անող ժողովրդի հետ կապ չունեն: Դժբախտաբար, կան զանազան խմբեր, որոնք նոր չեն, հանկարծ մեջտեղ են դուրս գալիս մի քանի հարյուր դիմակավորված անձինք, որոնք ձեռքների ունենում են լուսաձայնային ռումբեր, քարեր, ու սկսում են դրանք նետել: Այդ պահին նաև ոստիկանության ջոկատները պիտի հակազդեն: Ժողովուրդը, տեսնելով այս ամենը, հետ է քաշվում»,- ասել է մեր զրուցակիցը:

Նրա խոսքով՝ այս բախումները մեծ ամոթ են եղել Հունաստանի համար:

«Նրանք, ովքեր բարի մտադրությամբ էին այնտեղ, հետ են քաշվում, որ չվնասվեն ռումբերից կամ քարերից: Բախումները տևել են մի քանի ժամ, Աթենքի կենտրոնը լուրջ վնասներ է կրել: Այդ բախումները միտումնավոր են հրահրել, որ խաթարվի ցույցի բնույթը»,- եզրափակել է Քերոբ Էքիզյանը:

Մանրամասները՝ տեսանյութում։