Աղոթում եմ Աստծուն՝ գերության մեջ գտնվող Բակո Սահակյանի, Արկադի Ղուկասյանի, Ռուբեն Վարդանյանի և մյուսների հետ ոչինչ չպատահի․ Զատուլին

ՌԴ Պետդումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը Alpha News-ի եթերում անդրադարձել է արցախցիներին սեպտեմբերի 2-ին նշվող Արցախի Հանրապետության Անկախության կապակցությամբ:

«Լեռնային Ղարաբաղի հարգելի բնակիչներ, չճանաչված, բայց իրապես գոյություն ունեցող Լեռնային Ղարաբաղի Հանրապետության կամ այլ կերպ՝ Արցախի Հանրապետության քաղաքացիներ: ԼՂՀ պաշտոնական տոնի՝ Անկախության օրվա նախօրեին, որը նախորդ տարիներին նշվում էր սեպտեմբերի 2-ին, իմ պարտքն եմ համարում իմ կարեկցանքը հայտնել ձեզ, որոնք, ցավոք, 2020-2023 թվականների իրադարձությունների արդյունքում զրկվեցին իրենց հայրենիքից, լքեցին այն հողերը, որտեղ ապրել են ձեր նախնիները, ծնվել են ձեր երեխաները:

Սա, անշուշտ, հսկայական ողբերգություն է։ Եվ ով և ինչ էլ որ խոսի այս մասին, ես վստահ եմ, որ մենք չենք կարող Ռուսաստանում չարտահայտել մեր համակրանքն ու ցանկությունը՝ օգնելու ձեզ այսօրվա իրավիճակում: Ես հիմա չեմ ուզում խոսել քաղաքական խնդիրների մասին, մեղավորների անուններ տալ, թեև նրանք, իհարկե, կան։ Ուղղակի ուզում եմ ասել, որ նման պահին ռուսները, եթե իսկապես ռուս են, չեն կարող չզգալ կարեկցելու և օգնելու ցանկություն մեր հավատակիցների, հայերի հանդեպ, որոնք լքել են իրենց տները, իրենց թանկ վայրերը, իրենց եկեղեցիները, իրենց վանքերը և, ինչպես գիտենք, շատ կարճ ժամանակահատվածում ստիպված են եղել փախստական դառնալ։

Ես գրում եմ սա՝ իմ ուղերձը, խոսքը, կարելի է տարբեր կերպ անվանել, օգոստոսի 30-ին՝ իմ հին ընկեր Բակո Սահակի Սահակյանի ծննդյան օրը։ Այդ օրը ես միշտ շնորհավորել եմ նրան հերթական ծննդյան օրվա կապակցությամբ, այնպես, ինչպես նա էր դրանից մեկ շաբաթ անց շնորհավորում ինձ։ Մենք ծնվել ենք մեկ շաբաթվա տարբերությամբ։ Հուսով եմ, որ իմ խոսքերը կհասնեն նրան, չնայած դրանում լիովին վստահ չեմ: Նա, ինչպես Արկադի Ղուկասյանը, այնպես էլ Ռուբեն Վարդանյանն ու մյուսներն այսօր հայտնվել են գերության մեջ, հայտնվել են անազատության մեջ։ Եվ ես աղոթում եմ Աստծուն, որ նրանց հետ ոչինչ չպատահի, որ նրանք որքան հնարավոր է շուտ վերադառնան իրենց ընտանիքների մոտ, վերադառնան Հայաստան։ Որովհետև դժվար թե նրանք համաձայնեին մնալ այն Լեռնային Ղարաբաղում, որտեղ հայ բնակչություն չի մնացել։

Ես վստահ եմ, որ ապագայում կգտնվեն լուծումներ, որոնք թույլ կտան, առանց բռնության դիմելու, վերականգնել արդարությունը և թույլ չտալ շարունակել այն իրավիճակը, երբ մարդիկ, կրկնում եմ, այդ հողի բնիկներն են, այն հողի, որի վրա գտնվում են ոչ միայն Հայաստանի, այլև ամբողջ աշխարհի մշակույթի համար կարևորագույն հուշարձաններ, ճարտարապետություն, տաճարներ, վանքեր։ Ահա ես մեծ հույս ունեմ, որ նրանք կվերագտնեն նաև իրենց հոտ, իսկ այն հողերը, որոնք այսօր լքված են, նորից կմշակվեն իրենց տերերի աշխատասեր ձեռքով։ Բայց դա իմ ցանկությունն է։ Դա իմ հույսն է:

Ես վստահ եմ, որ նրանք, որոնք շարունակում են մտքերով ապրել Լեռնային Ղարաբաղում, ամեն օր՝ 24 ժամ, հենց այդ մասին են մտածում։ Եվս մեկ անգամ սեպտեմբերի 2-ի նախօրեին ուզում եմ ձեզ առաջին հերթին խաղաղություն մաղթել։ Բուժեք ձեր բոլոր վերքերը, լուծեք ձեր առջև ծառացած կյանքի բոլոր խնդիրները: Ես հույս ունեմ, որ Ռուսաստանում ոչ անտարբեր մարդիկ, ինչպես ինքը՝ Ռուսաստանը, այսօր նույնպես ապրում են ոչ այնքան լավ ժամանակներ, երբ մեր տարածքում՝ Կուրսկի մարզում, կա թշնամի, ոչնչացնում է մեր գյուղերը, նվաստացնում մեր քաղաքացիներին, ահա այս պահին, անկախ ամեն ինչից, մենք պետք է համերաշխություն ցուցաբերենք այն մարդկանց նկատմամբ, որոնք տուժել են, թեկուզև հեռու Ռուսաստանի այսօրվա տարածքից։

Այդպես է եղել միշտ, այդպես է եղել այն մեծ դժբախտությունների տարում, որոնք մենք միասին ապրել ենք հարյուրավոր տարիներ։ Ես վստահ եմ, որ անկախ քաղաքական և այլ կոնյունկտուրայից, այդ զգացմունքները կշարունակեն մեր մեջ ապագայի հույս ծնել։ Մաղթում եմ ձեզ երջանկություն, խաղաղ երկինք, առողջություն, իսկ ձեր երեխաներին, որոնք, հուսով եմ, սեպտեմբերի 2-ին դպրոց կգնան, հաջողություններ ուսման մեջ: Շնորհակալություն», — եզրափակել է Զատուլինը։