Այսօր առավել քան երբևէ Հայաստանի համար կարևոր է չտրվել տարբեր շահագրգիռ երկրների քաղաքական շահարկումներին․ Սամվել Կարապետյան
27 Մայիսի 2024, 19:00
«Տաշիր» ընկերությունների խմբի նախագահ և Հայ ձեռներեցների ասոցիացիայի նախագահ Սամվել Կարապետյանը կարևորում է Հայաստանի և Ռուսաստանի միջև կապերի պահպանումն ու զարգացում և Ռուսաստանի Դաշնության հայկական սփյուռքի դերը երկու երկրների հարաբերություններում։
«Պատմականորեն Ռուսաստանը Հայաստանի գլխավոր տնտեսական գործընկերն է։ Մեր՝ որպես հայ գործարարի, համայնքի խնդիրն է պահպանել և ընդլայնել այդ հարաբերությունները, համախմբվել և կամուրջ դառնալ մեր երկրների միջև հարաբերությունների արդյունավետ զարգացման համար։ Միջազգային հարաբերությունների ներկայիս ճգնաժամի պայմաններում կարևոր է պահպանել սերտ երկխոսություն քաղաքական, գործարար և մշակութային հանրության բոլոր մակարդակներում, որոնք ձևավորվել են մեր երկու երկրների միջև հարաբերությունների երկար տարիների ընթացքում։
Այսօր Հայաստանի համար առավել քան երբևէ կարևոր է չտրվել տարբեր շահագրգիռ երկրների քաղաքական շահարկումներին՝ հաշվի առնելով, որ այդ գործողություններն ուղղակի սպառնալիք են Հայաստանի տնտեսական անվտանգության համար: Եվ բոլորին կոչ եմ անում սթափ գնահատել նման քայլերի հետևանքները ։ Ոչ մի արտաքին հանգամանք չի կարող և չպետք է խոչընդոտ դառնա հայ-ռուսական համագործակցության մասնակիցների գործընկերության և համագործակցության զարգացմանը։ Եվ սրանում, իմ կարծիքով, կարևոր է մեզանից յուրաքանչյուրի պատասխանատվությունը»,- ասել է Կարապետյանը «Հայկական բիզնես ֆորում 2024»-ի բացմանը։
Նա նշել է Ռուսաստանում հայկական սփյուռքի հսկայական ներդրումը իրենց պատմական հայրենիքի զարգացման գործում և Հայաստանի քաղաքական ուժերի կողմից սփյուռքի շահերը հաշվի առնելու անհրաժեշտությունը։
«Ռուսաստանն ունի ամենամեծ հայկական սփյուռքը, որը հայ-ռուսական համագործակցության հիմքն է։ Անհնար է հաշվի չառնել այն փաստը, որ հայկական սփյուռքը բոլոր ժամանակներում եղել է կարևոր կապող օղակ երկու երկրների միջև և առ այսօր շարունակում է նշանակալից դեր խաղալ Հայաստանի կյանքում և զարգացման գործում։ Ռուսաստանի հայերը ակտիվորեն մասնակցում են տնտեսական և սոցիալական նախագծերին, ներդրումներ են կատարում Հայաստանում և զբաղվում բարեգործական գործունեությամբ՝ դրանով իսկ նպաստելով երկրի զարգացմանը։ Սփյուռքի՝ հանրապետությունում կյանքի վրա ազդելու կարողությունը խոսում է նրա կարևոր դերի մասին՝ որպես Հայաստանի համար ռեսուրսների, գիտելիքների և փորձի լրացուցիչ աղբյուր:
Այս առումով ուզում եմ նշել, որ Հայաստանի ներկայիս քաղաքական ուժերը չեն կարող հաշվի չառնել Սփյուռքի շահերը, որն աշխատում է ոչ միայն ի շահ Ռուսաստանի, այլ նաև Հայաստանի։ Ուժեղ Սփյուռքը հզոր հենարան է Հայաստանի համար»,- ասել է Կարապետյանը։
«Կցանկանայի նաև ուշադրություն հրավիրել պատասխանատվության աստիճանի վրա, որն այսօր սփյուռքի, մեր և ձեր առջևում է։ Եվ առաջին հերթին վստահելի գործընկերներ լինելը պատասխանատվություն է: Վերջին տարիները շատ դժվար են դարձել Հայաստանի համար։ Մենք բոլորս խորապես անհանգստացած ենք և կանգնած ենք հայ ժողովրդի, արցախցիների կողքին։ Մենք կանգնել ենք և կշարունակենք կանգնել, անկասկած։ Մենք անմասն չմնացինք նաև անցյալ տարվա սեպտեմբերին Արցախում տեղի ունեցած իրադարձություններից։
Եվ նրանք լիակատար խնամակալ եղան հազարավոր ընտանիքների համար, որոնք ստիպված էին լքել իրենց տները: Աջակցությունը շարունակվում է մինչ օրս։ Հատկապես ուզում եմ նշել, որ «Տաշիր» բարեգործական հիմնադրամի համար արցախցիներին ուղղված օգնությունը մնալու է առաջնահերթություն։ Եվ կոչ եմ անում բոլորիդ չմոռանալ մեր պարտքի մասին՝ ապահովել հնարավոր բոլոր մասնակցությունը մեր հայրենակիցներին աջակցելու համար»,- հավելել է նա։
«Տաշիր» ընկերությունների խմբի ղեկավարը հույս է հայտնել, որ ֆորումը, որին մասնակցում էին Ռուսաստանի և Հայաստանի գործարար համայնքի ականավոր ներկայացուցիչներ, հաջողություն կունենա և լրացուցիչ հնարավորություններ կբացի համատեղ աշխատանքի համար և կդառնա նոր նախաձեռնությունների սկիզբ:
«Ցանկանում եմ նշել, որ չնայած վերջին տարիների դժվարություններին, Հայաստանը շարունակում է մնալ բարենպաստ երկիր բիզնեսով զբաղվելու համար, հատկապես ռուսների համար։ Հայաստանը երկար ժամանակ տնտեսական աճով շարունակում է առաջնորդել Եվրասիական միության երկրներին… Կարևոր է հասկանալ, որ այսօր մեզանից իրական գործողություններ են պահանջվում, ոչ թե պատրանքներ, այլ կոնկրետ քայլեր։ Մենք պետք է նայենք դեպի ապագա, ստեղծենք հնարավորություններ տնտեսության և բիզնեսի զարգացման համար, որտեղ Հայաստանը կարող է կայուն զարգանալ և բարգավաճել: Ես կարծում եմ, որ դա հնարավոր է»,- նշել է նա։
Կարապետյանը կոչ է արել ամրապնդել փոխվստահությունը, զարգացնել գործարար կապերը և ընդլայնել երկխոսությունը տարբեր ոլորտներում Հայաստանի և Ռուսաստանի միջև:
«Մեր հարաբերությունների հիմքում պետք է ընկած լինեն միմյանց նկատմամբ հարգանք ու փոխըմբռնում ցուցաբերելու կարողությունը»,- ընդգծել է Կարապետյանը։
Ելույթի ավարտին Սամվել Կարապետյանը հիշել է նաև ադրբեջանական բանտում գտնվող հայ գերիներին ու աջակցության խոսքեր հայտնել նրանց։
«Վերջում ուզում եմ աջակցության խոսքեր հայտնել անարդարացիորեն ձերբակալված և Բաքվի բանտում գտնվող մեր բոլոր հայրենակիցներին։ Եվ հիշեցնեմ, որ այսօր մեր ընկեր Ռուբեն Վարդանյանի ծննդյան օրն է։ Եվ մաղթել նրան և նրանց բոլորին ուժ և քաջություն՝ արժանապատվորեն անցնելու այս փորձությունը»,- ասել է նա։
Հիմա եթերում
