«Ծնվել եմ Արցախում». Մոսկվայում տեղի է ունեցել համերգ՝ ի աջակցություն պատանի երաժիշտների

Մոսկվայի հայկական մշակույթի ակադեմիայում տեղի է ունեցել դիրիժոր Սերգեյ Սմբատյանի նախաձեռնած «Ծնունդով Արցախից» (Born in Artsakh) ծրագրի բարեգործական շնորհանդես-համերգը։

Բեմում հանդես են եկել պատանի երաժիշտներ՝ ծրագրի մասնակիցները, որոնք կատարել են հայ և համաշխարհային կոմպոզիտորների ստեղծագործություններ։ Նրանք այն երեխաներն են, որոնք հարկադրված լքել են հայրենիքը, և այժմ շարունակում են իրենց երաժշտական կրթությունը բարեգործական նախաձեռնության աջակցությամբ։

Ծրագիրն ուղղված է տաղանդավոր երեխաներին աջակցելուն, նրանց ստեղծագործական ներուժի զարգացմանը և հայ մշակութային ժառանգության պահպանմանը։ Կազմակերպիչները շեշտել են, որ սա պարզապես համերգ չէ, այլ հույսի, ոգեշնչման և վերածննդի խորհրդանիշ։ Հատկապես կարևոր է, որ միջոցառումն առաջինն էր Ակադեմիայի նոր բեմում։

«Մենք երախտապարտ ենք նման կարևոր և ազնիվ գործի մի մասը լինելու հնարավորության համար»,- ասվում է հաղորդագրության մեջ։