Դեպի Հայաստան կազմակերպված տուրերի պահանջարկը նվազել է ավիատոմսերի գների պատճառով

Հայաստանը, տուրօպերատորների գնահատմամբ, շարունակում է մնալ ռուսաստանցիների շրջանում հայտնի ուղղություն ինչպես զբոսաշրջային նպատակներով, այնպես էլ որպես տարանցիկ կետ դեպի այլ երկրներ թռիչքների համար։

«Զվարթնոց» միջազգային օդանավակայան թռիչքներ են իրականացնում 8 ռուսական և 4 հայկական ավիաընկերություններ Ռուսաստանի 17 քաղաքներից: Երևանից ուղիղ չվերթներ էլ իրականացնում են 22 երկրներ։ Դրանք կազմակերպում են 33 փոխադրողներ, այդ թվում ՝ Lufthansa, Wizz, Air France, Qatar Airways, Aegean Airlines, Flydubai։

Սակայն փորձագետները նշում են, որ այս տարի կազմակերպված զբոսաշրջային հոսքը նվազել է ավիատոմսերի թանկացման պատճառով։

«Վանդ» ընկերության մենեջեր Իրինա Մեդվեդևայի խոսքով՝ Հայաստանի մասին սկսել են ավելի քիչ հետաքրքրվել նաև քաղաքական նկատառումներով: Սակայն, ըստ «Ռուսական Էքսպրես» հոլդինգի հասարակայնության հետ կապերի դեպարտամենտի տնօրեն Աննա Ֆիլատովսկայայի, Հայաստանի նկատմամբ հետաքրքրությունը չի նվազում։

«Սա սակավաթիվ շուրջտարյա և միևնույն ժամանակ բյուջետային ուղղություններից մեկն է։ Ցանկացած սեզոնին կան հանգստի տարբերակներ։ Գարնանը և ամռանը մեզ մոտ առավել տարածված են էքսկուրսիոն տուրերը դեպի Հայաստան», — ասել է նա։

Վիճակագրության համաձայն՝ 2023 թվականին Հայաստան է այցելել 2,3 միլիոն օտարերկրյա զբոսաշրջիկ։ Դա գրեթե 40%-ով ավելի է, քան 2022-ին, և 21% — ով ավելի, քան 2019 թվականի նախահամաճարակային ժամանակաշրջանում: Զբոսաշրջիկների ընդհանուր թվի ավելի քան կեսը Ռուսաստանից է ՝ 1,2 մլն: Երկրորդ տեղում Վրաստանն է (255,4 հազար), երրորդում՝ Իրանը (150 հազար), ապա՝ ԱՄՆ-ը (59 հազար) և Գերմանիան (28 հազար):