Ելենա Տեր-Ավագյան. Նրա կտավներում հայրենիքի հանդեպ սերն է

Alpha News-ը շարունակում է ներկայացնել «Ալֆա պերսոնա» շարքը:

Ապրիլի 7-ը գեղանկարչուհի Ելենա Տեր-Ավագյանի ծննդյան օրն է։

Ելենա Տեր-Ավագյանը ծնվել է 1936 թվականին Երևանում: Սովորել է Փ. Թերլեմեզյանի անվան գեղարվեստի ուսումնարանում, 1963թ. ավարտել է Երևանի գեղարվեստա-թատերական ինստիտուտը։ Նրա ուսուցիչների թվում էր ՀՀ ժողովրդական նկարիչ Արա Բեքարյանը, ում դասերն առանցքային դեր են խաղացել նկարչուհու ստեղծագործական կյանքում։

1970 թվականից Ելենա Տեր-Ավագյանը եղել է ԽՍՀՄ Նկարիչների միության անդամ՝ ակտիվորեն մասնակցելով բազմաթիվ գեղարվեստական ցուցահանդեսների՝ ցուցադրելով իր ակնառու գեղարվեստական ուժն ու արվեստի հանդեպ չմարող սերը: Նրա արվեստը ընդգրկում է տարբեր ժանրեր, բայց նա իրեն հատկապես վառ է դրսևորել գրաֆիկայի և գեղանկարչության մեջ։ 27 տարի՝ 1964-1991 թվականներին, նա իր փորձն ու գիտելիքները փոխանցել է երիտասարդ նկարիչներին՝ դասավանդելով Երևանի պոլիտեխնիկական ինստիտուտում:

Ելենա Տեր-Ավագյանի տաղանդը չէր սահմանափակվում միայն ակադեմիական գիտելիքներով։ Լինելով դասական երաժշտության մեծ երկրպագու՝ նա ոգեշնչվել է մեծ երաժիշտներից և ստեղծել է մի շարք դիմանկարներ, որոնց թվում են Սվետլանա Նավասարդյանը, Արթուր Փափազյանը, Վան Քլիբերնը (ԱՄՆ), Վլադիմիր Հորովիցը, դիրիժոր Եվգենի Մրավինսկին, իսպանացի կիթառահար Պակո դե Լուսիան և թավջութակահար Սուրեն Բագրատունին:

Նրա ժառանգության մեջ առանձնահատուկ տեղ է գրավում Ռ. Ահարոնյանի դիմանկարը: Այս գլուխգործոցը ձեռք է բերել Հայաստանի պետական պատկերասրահը և դարձել երկրի մշակութային ժառանգության նշանակալի մասը: Բացի այդ, Ելենա Տեր-Ավագյանը նկարել է Հայաստանի բնությունը և ստեղծել այնպիսի հայտնի գործեր, ինչպիսիք են «Կապուտակ Սևանը», «Շիրակի հարթավայրը», «Հռիփսիմե տաճարը» և այլն։

Առանձնահատուկ ուշադրության է արժանի նրա «ծաղկային» շարքը, այդ թվում՝ «Սևանի կակաչները», «Արևածաղիկներ», «Վարդեր»:

Ելենա Տեր-Ավագյանի ստեղծագործությունը գնահատվում է ոչ միայն Հայաստանում, այլև նրա սահմաններից դուրս: Նրա նկարները զարդարում են Հայաստանի, ԱՄՆ-ի, Եվրոպայի և Ռուսաստանի մասնավոր հավաքածուներն ու պատկերասրահները:

Ելենա Տեր-Ավագյանը կյանքից հեռացել է 2014 թվականի հոկտեմբերի 28-ին: