Էրդողանն այն մարդն է, որին չի կարելի բացարձակապես հավատալ ո՛չ Ռուսաստանում, ո՛չ Հայաստանում. Սեմյոն Բաղդասարով
18 Հուլիսի 2023, 20:52
Մերձավոր Արևելքի և Կենտրոնական Ասիայի երկրների ուսումնասիրության կենտրոնի տնօրեն Սեմյոն Բաղդասարովը Alpha News-ի հետ զրույցում մեկնաբանել է Ուկրաինայի առաջարկով հացահատիկի գործարքը շարունակելու Թուրքիայի որոշման հնարավորությունը՝ չնայած դրանից Ռուսաստանի դուրս գալուն:
Փորձագետի կարծիքով՝ Թուրքիան միանգամայն կարող է գնալ այդ քայլին, չնայած այդ պատճառով կարող են վատթարանալ Ռուսաստանի հետ հարաբերությունները։
«Թուրքիան վատթարացման կգնա Ռուսաստանի հետ, քանի որ Էրդողանը դեմոնստրատիվ կերպով իր ամերիկամետ ուղղվածությունն է ի ցույց դնում։ Ուշադրություն դարձրեք, թե ինչպես է ընտրություններից հետո նա իրեն պահում ԱՄՆ-ի նկատմամբ՝ ավելի նվիրված դաշնակից դժվար է գտնել։ Այդ պատճառով ամեն ինչ անելու է՝ ցույց տալու իր հեռանալը Ռուսաստանից, այստեղ կասկած չունեմ։
Ինչ վերաբերում է բուն հացահատիկի գործարքին, ապա ուզում եմ հիշեցնել նրա արտահայտությունը, որն ասել էր դեռ այն ժամանակ, երբ հացահատիկի գործարքն աշխատում էր: «Թուրքիան Աֆրիկային կերակրելու է ռուսական հացահատիկով»: Վատ չէ ասված, այո՛ : Դրանով նա ցույց է տալիս, որ իրեն չի կարելի բացարձակապես հավատալ՝ ո՛չ Ռուսաստանում, ո՛չ Հայաստանում, ո՛չ էլ այլ տեղ։
Եվ, երբ Հայաստանում հավատում են ամեն տեսակի քաղցր ճառերի, և հայկական ղեկավարությունը փորձում է հաճոյանալ թուրքական ղեկավարությանը, հսկայական սխալ է թույլ տալիս՝ վտանգելով Հայաստանի ազգային անվտանգությունը, այնպես, ինչպես Ռուսաստանում են մոլորվել այս ամբողջ տարիներին, ինչի մասին ես ստիպված եմ եղել խոսել այդ տարիների ընթացքում», — հայտարարել է Բաղդասարովը:
Հիմա եթերում
