Էրդողանը ցույց տվեց, որ չի մարսել Իրանի հոգևոր առաջնորդի խոսքերը Հայաստանի մասին. Անի Ավետյան

«Էրդողանը շատ լավ հասկանում է, որ պետք չէ ավելի սադրել, ավելի գրգռել, Թեհրանին, քանի որ նաև լավ հասկանում է, որ Ադրբեջան-Իրան հարաբերությունները խիստ լարված են և հենց Զանգեզուրի միջացնք ասվածի շուրջ եղած հակասությունների պատճառով», — Թուրքիայի ներքին և արտաքին քաղաքականության հետազոտող վերլուծաբան Անի Ավետյանն այսպես է մեկնաբանել Alpha Newsroom-ի ուղիղ եթերում Թուրքիայի նախագահի՝ Բաքվից Անկարա վերադարձի ճանապարհին՝ ինքնաթիռում արած հայտարարությունն առ այն, թե «Զանգեզուրի միջանցքի» հարցով ոչ թե Հայաստանի, այլ Իրանի հետ խնդիր կա, և եթե Իրանը դրական մոտեցում ցուցաբերի, ապա Թուրքիան, Իրանը և Ադրբեջանը կկապվեն միմյանց հետ:

Անի Ավետյանը նկատել է, որ Ռեջեփ Թայիփ էրդողանը Բաքու կատարած իր այցի ընթացքում մի ամբողջ օր տարբեր ձևաչափերով հանդիպել է Ալիևի հետ, նրանք քննարկել են նաև «Զանգեզուրի միջանցքի» հարցը, մինչդեռ Թուրքիայի նախագահը Բաքվում չի անդրադարձել Իրանին, դրա մասին խոսել է միայն, երբ դուրս է եկել Ադրբեջանի տարածքից՝ ինքնաթիռում:

ԻԻՀ-ն բազմիցս հայտարարել է, որ չի ընդունելու Հայաստանի ինքնիշխան տարածքի փոփոխություն, քանի որ այդպիսով Թուրքիան ու Ադրբեջանն Իրանին կմեկուսացնեն հյուսիսից, և Իրանին շատ ծանր դրության մեջ կդնեն: Անի Ավետյանը հիշեցրել է, որ 2022-ի ամռանը Իրանի հոգևոր առաջնորդ Ալի Խամենեն Թուրքիայի նախագահ Էրդողանին ասել է, որ Իսլամական Հանրապետությունը դիմադրելու է Իրանի և Հայաստանի միջև սահմանը փակելու քաղաքականությանը, քանի որ այդ սահմանը հազարամյա վաղեմություն ունեցող հաղորդակցական ճանապարհ է։ Այդպիսով Խամենեն ընդգծել է, որ նախքան Թուրքիայի ի հայտ գալը՝ Իրանն է տարածաշրջանում թելադրող եղել, հետևաբար չի պատրաստվում զիջել իր դիրքերը:

«Մեկ տարի հետո ինքնաթիռում արված այս վերջին հայտարարությամբ Էրդողանը ցույց տվեց, որ չի մարսել Խամենեի խոսքերը», — շեշտել է Թուրքիայի ներքին և արտաքին քաղաքականությամբ լրագրողը: Նրա վերլուծությամբ՝ որքան էլ Թուրքիայի ուղեղային կենտրոնները փորձում են մատնանշել, որ այստեղ տնտեսական գործոն կա, և Իրանն էլ իր հերթին տնտեսական այլընտրանքային ճանապարհ է առաջարկում իր տարածքով, սակայն Անիի համոզմամբ, թուրքերը իրանական առաջարկը շրջանցելու համար հազար ու մի պատճառ կգտնեն:

Իրանն իրեն չի կարող թույլ տալ այն ճոխությունը, որ Հայաստանի հետ սահմանը թուրքերը ոչնչացնեն, հակառակ դեպքում իրանական պետության համար կփակվի արտաքին աշխարհ տանող եզակի ելքերից մեկը, որը չունի Էրդողանի ազդեցությունը: Անիի համոզմամբ՝ Իրանը պաշտպանում է Հայաստանի շահերը, քանի որ Հայաստանի տարածքը կենսական նշանակություն ունի իր համար:

Մանրամասները՝ տեսանյութում: