Երուսաղեմի դատարանը մերժել է Հայկական թաղամասի շուրջ դատական հայցերը միավորելու միջնորդությունը․ Horizon Weekly
14 Հունվարի 2026, 18:05
Երուսաղեմի շրջանային դատարանը հունվարի 9-ին մերժել է «Xana Gardens Ltd.» ընկերության միջնորդությունը՝ «Կովերի պարտեզի» սեփականության վերաբերյալ հայ համայնքի հայցը Հայոց պատրիարքարանի ներկայացրած առանձին գործին միավորելու մասին։ Սա կարևոր իրադարձություն է Երուսաղեմի հայկական թաղամասի ապագայի շուրջ շարունակվող դատական պայքարում, հայտնում է Horizon Weekly-ն։
«Xana Gardens»-ը պնդել է, թե երկու գործերի միավորումը կբարձրացնի դատավարության արդյունավետությունը՝ պատճառաբանելով, որ դրանք առնչվում են նմանատիպ իրավական խնդիրների։
Հայ համայնքի փաստաբանները դեմ են արտահայտվել այս հայցին՝ ընդգծելով, որ դատական վարույթները հիմնված են տարբեր փաստացի և իրավական հիմքերի վրա։ Նրանք նաև նշել են, որ «Xana Gardens»-ն արդեն ավելի քան երկու տարի է, ինչ չի կարողանում պաշտպանական հայտարարություն ներկայացնել Պատրիարքարանի գործով։
Դատարանը համաձայնել է դրան՝ վճռելով, որ, չնայած արտաքին նմանությանը, այս գործերը առաջ են քաշում իրավական և ապացուցողական տարբեր հարցեր և պետք է քննվեն միմյանցից անկախ ձևով։ Բացի այդ, դատարանը եզրահանգել է, որ միավորումը չի բարձրացնի դատական համակարգի արդյունավետությունը և կարող է հանգեցնել դատավարական ձգձգումների։ Դատական ծախսերի վերաբերյալ որոշում չի կայացվել։ Ինչպես ընդգծում է լրատվամիջոցը, դատարանն ընդունել է, որ համայնքի հայցը վիճարկում է Պատրիարքարանի՝ «Կովերի պարտեզի» կառուցման վերաբերյալ վիճահարույց համաձայնագիր կնքելու լիազորությունները, ինչը անկախ դատական քննություն է պահանջում։
Այս որոշումը երաշխավորում է, որ յուրաքանչյուր գործ կքննվի ըստ էության։ Որոշումը կայացվել է Երուսաղեմի Հայկական թաղամասի ապագայի վերաբերյալ մեծ մտահոգությունների ֆոնին. այն Հին քաղաքի չորս պատմական թաղամասերից մեկն է, որտեղ ավելի քան 1600 տարի մշտապես բնակվել են հայ քրիստոնյաներ։
Վեճի կենտրոնում «Կովերի պարտեզն» է՝ Սիոն լեռան վրա գտնվող հողատարածքը, որի երկարաժամկետ վարձակալության առաջարկը լայն ընդդիմություն է առաջացրել հայ համայնքի շրջանում։
Համայնքի առաջնորդները զգուշացնում են, որ գործարքը սպառնում է ոչ միայն հայերի գույքային իրավունքներին, այլև Հին քաղաքում հայկական ներկայության տարածքային ամբողջականությանն ու երկարաժամկետ կենսունակությանը։ Սա այս դատավարությունների ելքը վճռորոշ է դարձնում Երուսաղեմի հնագույն բնիկ համայնքներից մեկի պահպանման համար։
Հիմա եթերում
