Եթե պետության գլխին կանգնած քաղաքական գործիչը ժխտում է իր ժողովրդի ցեղասպանությունը, նա ոչնչացնում է ողջ պատմությունը. Ալեքսանդր Չերյոմին

Պրոֆեսոր, պատմական գիտությունների դոկտոր Ալեքսանդր Չերյոմինը Alpha News-ի հետ զրույցում անդրադարձել է Հայաստանի իշխանությունների կողմից Հայոց ցեղասպանությունը ժխտելու փորձերին։

«Եթե պետության գլխին կանգնած քաղաքական գործիչը ժխտում է իր ժողովրդի ցեղասպանությունը, ապա նա գրեթե ոչնչացնում է ողջ պատմությունը։ Ընդհակառակը, պետք է այսօր անընդհատ ցույց տալ, որովհետև եթե Թուրքիային հաճոյանանք և հայ ժողովրդի պատմության այս ամենադժվար շրջանն ամբողջությամբ հանենք, ինչպիսին է Ցեղասպանությունը, ապա Թուրքիան կասի, որ այն տարածքը, որտեղ այսօր գտնվում է Հայաստանի Հանրապետությունը, դա նախկինում եղել է Օսմանյան կայսրության տարածքը։

Սեփական երկրի շահերը պաշտպանելու համար պետք է խոսել այն մասին, որ 19-րդ դարում և 20-րդ դարի սկզբին եղել է Ցեղասպանություն, և սա ամենակարևոր պաշտպանությունն է թուրքական էքսպանսիայի դեմ։ Դուք չեք կարող հաճոյանալ ձեր երդվյալ թշնամուն: Թուրքիան այս ամենը նույնիսկ չի նկատի, երբ ախորժակ ունենա հետագայում ավելի ընդլայնելու իր տարածքը»,- ասել է Չերյոմինը։

Պատմաբանի կարծիքով՝ ցեղասպանության ժխտումը կարող է հանգեցնել նրան, որ Հայաստանը, որպես պետություն, պարզապես գոյություն չի ունենա։

«Այս ամենը կբերի նրան, որ Հայաստանը որպես պետություն պարզապես գոյություն չի ունենա, և Թուրքիան կասի, որ մենք զբաղեցնում ենք մեր նախնյաց հողերը, ոչ մի ցեղասպանություն, նույնիսկ բառ չի արտաբերի: Այսօր մենք պետք է տեր կանգնենք բուն Հայաստանի պաշտպանությանը, որը գտնվում է մուրճ ու զնդանի արանքում՝ Թուրքիայի և Ադրբեջանի միջև։ Պետք է լինի համաշխարհային օգնություն, որպեսզի ցեղասպանությունը, որ եղել է ավելի քան 100 տարի առաջ, չկրկնվի:

Երբ պատմությունը մոռացվում է, գալիս է ինչ-որ ագրեսոր։ Եվ հետևաբար, մենք պետք է անընդհատ բոլոր լրատվամիջոցներով՝ հեռուստատեսությամբ, ռադիոյով, թերթերով ասենք, որ Ցեղասպանությունը եղել է։ Պետք է հիշել, թե ինչ արեցին հայ ժողովրդի հետ, և ինչպես թուրքերն իրենց պահեցին մի ամբողջ ժողովրդի նկատմամբ, ուստի պետք է անընդհատ խոսել ու խոսել այս մասին։ Իսկ եթե դա տեղի չունենա, ապա Հայաստանը քիչ պաշտպանական գործառույթներ կունենա, քանի որ հակառակ դեպքում կասեն, որ Հայաստանն ու Թուրքիան ժամանակին շատ լավ են ապրել, իսկ դա նշանակում է, որ պարզապես տեղի է ունենում Օսմանյան կայսրության վերադարձն իր բնիկ հողերին»,- եզրափակել է Չերյոմինը։