Հայաստանում քաղբանտարկյալների առկայությունը հակասում է Եվրոպայի սկզբունքներին․ ԵԽ պատգամավոր

«Մենք դիմել ենք Եվրոպական խորհրդարանի նախագահ Ռոբերտա Մեցոլային՝ խնդրելով Հայաստանի ղեկավարությանը, ի դեմս Ստրասբուրգում ելույթ ունեցած վարչապետի, հստակ փոխանցել մեր դիրքորոշումը քաղաքական բանտարկյալների առկայության անթույլատրելիության վերաբերյալ»,- Alpha News-ին տված հարցազրույցում հայտարարել է Եվրախորհրդարանի նիդերլանդացի պատգամավոր, «Կանաչների» խմբի համանախագահ Բաս Այքհաութը՝ պատասխանելով հարցին, թե արդյոք վարչապետի հետ քննարկվել են ոչ միայն համագործակցության հարցերը, այլև երկրի ներքաղաքական իրավիճակը։

Նրա խոսքով՝ եվրոպական կողմը հստակ հասկացրել է, որ համագործակցության ընդլայնումն ու նոր դաշնակիցների հետ կապերի հաստատումը բնական և անհրաժեշտ գործընթաց են։ Սակայն, միևնույն ժամանակ, Եվրոպան անփոփոխ կերպով պետք է հենվի իրավունքի գերակայության սկզբունքների վրա։

«Մենք շեշտում ենք, որ դատապարտում ենք քաղբանտարկյալների առկայությունը։ Նման երևույթներն անհամատեղելի են ժողովրդավարական պետության սկզբունքներին, որի հետ Եվրոպան մտադիր է զարգացնել գործընկերությունը»,-նշել է Այքհաութը։

Նիստի և վարչապետի ելույթի ընթացքում հարցեր տալու հնարավորություն չի եղել. ձևաչափը նախատեսում էր բացառապես ելույթ։ Այդուհանդերձ, ըստ պատգամավորի, կուլիսներում աշխատանքներ են տարվել։

«Բնականաբար, մենք այդ հարցերը քննարկել ենք կուլիսներում։ Ռոբերտա Մեցոլան կապի մեջ է վարչապետի հետ, ուստի համապատասխան ազդակները պետք է փոխանցվեն»,-հավելել է նա։