Եվրոպայի խորհրդի Նախարարների կոմիտեն պետք է քայլեր ձեռնարկի Լեռնային Ղարաբաղում սրվող իրավիճակի վերաբերյալ
23 Հունիսի 2023, 11:16
![](https://media.alphanews.am/wp-content/uploads/2023/06/23100926/1059494.jpg)
Եվրոպայի խորհրդի խորհրդարանական վեհաժողովը (ԵԽԽՎ) վճռականորեն աջակցել է «Լաչինի միջանցքով ազատ և անվտանգ մուտքի ապահովման մասին» բանաձեւին, ինչպես նաեւ առաջարկություններին, որոնք հստակ եւ ուժեղ ուղերձ են հղում Եվրոպայի խորհրդի Նախարարների կոմիտեին՝ Լեռնային Ղարաբաղում սրվող իրավիճակի վերաբերյալ քայլեր ձեռնարկելու մասին։ Այս մասին Alpha News-ին տված հարցազրույցում ասել է իռլանդացի պատգամավոր, բանաձեւի հեղինակ Փոլ Գավան։
Պատասխանելով հարցին, թե բանաձեւը կարո՞ղ է ազդել իրավիճակի փոփոխության վրա, եւ արդյոք դա կհանգեցնի Լաչինի միջանցքի բացմանը՝ Գավան նշել է, որ չգիտի այս հարցի պատասխանը։
«ԵԽԽՎ-ում համոզված եմ, որ այս խնդրին պատշաճ ուշադրություն չի դարձվել։ Ես բանավեճում շատ հստակ ասացի, որ ստեղծված իրավիճակը բացարձակապես անընդունելի է։ Եթե համապատասխան քայլեր չձեռնարկվեն, ես լուրջ մտավախություն ունեմ, որ մարդիկ ստիպված կլինեն լքել իրենց տները, Նախարարների կոմիտեն հստակ կոչ է արել Բաքվին գործել, բայց ես վստահություն ունե՞մ, որ Ադրբեջանը կլսի: Ճիշտն ասած՝ ոչ»,- նկատել է բանախոսը։