ԵԽԽՎ-ն «տարված չէ» Ադրբեջանով, այն գործում է օրենքի գերակայության և ընթացակարգերի շրջանակներում. Թեոդորոս Ռուսոպուլոս
27 Հունիսի 2025, 23:14
«Ես երբեք դեմ չեմ եղել երկխոսությանը»,- այս մասին ճեպազրույցում ասել է ԵԽԽՎ նախագահ Թեոդորոս Ռուսոպուլոսը՝ պատասխանելով Ադրբեջանի նախագահ Իլհամ Ալիևի վերաբերյալ իր հայտարարությունների մասին հարցին, ում նա նախկինում «բռնապետ» էր անվանել։
«Մեր առաջին հանդիպման ժամանակ, որը տեղի ունեցավ 2024 թվականի հունվարին, հնարավոր է՝ փետրվարի սկզբին, ես ասացի, որ որպես միգրացիայի կոմիտեի նախագահ բազմիցս խնդրել եմ իմ գործընկերներին այցելել Լաչինի միջանցք՝ Լեռնային Ղարաբաղ։Այլ հանձնաժողովներ ևս դիմել էին՝ թույլտվություն ստանալու այցելելու բանտարկյալներին։ Բացի այդ, մեզ չեն հրավիրել հետևելու Ադրբեջանի ընտրություններին։ Սրանք այն կետերն են, որոնց վրա ես ուզում էի ուշադրություն հրավիրել»,- նշել է նա՝ ընդգծելով, որ այս հարցերի բավարար պատասխանի բացակայությունն է եղել ԵԽԽՎ-ում ադրբեջանական պատվիրակության լիազորությունները վիճարկելու պատճառը։
Ես այն ժամանակ ասացի, որ կփորձեմ ավելի ուշ։ Դա շատ լավ եմ հիշում. նախագահական կոմիտեի նիստում ես իմ գործընկերներին, քաղաքական խմբերի առաջնորդներին ասացի, որ հիմա գուցե ժամանակը չէ, բայց գուցե երեք ամիս հետո նորից փորձեմ։Ես շատ լավ հիշում եմ, թե ինչ եմ ասել հենց այդ ժամանակ, քանի որ օգտագործել եմ Ադրբեջանի խորհրդարանի խոսնակ Ջաֆարովայի անունը, որը վեհաժողովի կազմում էր։ Ես լավ աշխատանքային հարաբերություններ ունեի նրա հետ Միգրացիոն կոմիտեում: Եվ ես ուզում եմ ձեզ ասել՝ եթե խոսեք, օրինակ, նախարարների կոմիտեի անդամի հետ, կիմանաք, որ վերջին անգամ, երբ հանդիպում եմ ունեցել նախարարների կոմիտեում, մոտ 10 էջանոց տեքստ ունեի, որն անձամբ ես էի գրել։ Տեքստում շարադրված էին այն ջանքերը, որոնք ես անձամբ ձեռնարկել եմ, ինչպես նաև Եվրոպայի Խորհրդի գլխավոր քարտուղարն ու քաղաքական առաջնորդները, որպեսզի ճանապարհ գտնեն ոչ միայն երկխոսության, այլև իրական լուծումների համար։
Երկխոսությունը հանուն երկխոսության ոչինչ է: Բոլոր դեսպանները, առանց բացառության, ներկա էին և բոլորը լսեցին։ Դա արդարացում կամ ներողություն չէր։ Ես ցանկանում էի նրանց փոխանցել, որ Վեհաժողովը մոլորված չէ։ Վեհաժողովում հնչում են տարբեր ձայներ։ Նախարարների կոմիտեում դուք լսում եք պետության ձայնը։ Ակնհայտ է, որ յուրաքանչյուր դեսպան ներկայացնում է իր երկիրը և, ըստ էության, խոսում է իր կառավարության անունից։
Վեհաժողովում մենք ունենք արտոնություն՝ լսելու տարբեր ձայներ։ Յուրաքանչյուր երկրից, եթե ոչ բոլորից, ապա ճնշող մեծամասնությունից, Վեհաժողովում ներառված են ոչ միայն իշխող կուսակցությունների, այլև ընդդիմության ներկայացուցիչներ: Ահա թե ինչով է առանձնանում Վեհաժողովը։
Ես դա նշում եմ, որովհետեւ ուզում եմ ընդգծել, որ վեհաժողովը չի գործում որևէ կոնկրետ կողմի ազդեցության տակ, մեզ իսկապես անհրաժեշտ են փաստեր, մեզ անհրաժեշտ են գործողությունները հաստատող որոշակի տարրեր, և դա վերաբերում է ոչ միայն Ադրբեջանին, այլև այլ երկրներին, օրինակ՝ Վրաստանին։
Հիմա սա հստակ ասելու ժամանակն է։ Այո, ես նախկինում խոսել եմ այդ մասին, և ապրիլին հայտնել եմ, որ դեռևս հունվարին մտահոգություն եմ հայտնել.եթե մենք շարունակենք ընտրողաբար մոտենալ որոշակի իրավիճակներին, ապա հաջորդ քայլը կարող է լինել որոշ պետությունների կողմից դատարանի որոշումները ճանաչելու կամ կատարելու մերժումը: Եվ այդպես էլ եղավ. Ադրբեջանի նախագահն ուղղակիորեն հայտարարեց, որ երկիրը դրանք չի իրականացնելու։ Ես մարգարե չեմ, որ գուշակեմ ապագան, բայց քաղաքական տեսակետից և փորձից ելնելով կարող էի այս եզրակացությունն անել։ Սա չի վերաբերում մեկ կոնկրետ երկրի, սա ընդհանուր տագնապալի միտում է, որը կա ոչ միայն Ադրբեջանում, այլ նաև, օրինակ, Վրաստանում»,- նշել է նա։
Խոսելով Ալիևի և ԵԽ գլխավոր քարտուղարի հանդիպման մասին՝ ԵԽԽՎ նախագահը նշել է, որ ինքը և գլխավոր քարտուղարը միասին աշխատում են՝ հիմնվելով նույն արժեքների վրա, թեև տարբեր կերպ են գործում։
«Սա մի բան է, որի մասին մենք մեկ անգամ չէ, որ խոսել ենք՝ և՛ ես, և՛ գլխավոր քարտուղարը: Գլխավոր քարտուղարն ընտրվում է Վեհաժողովի կողմից, և մենք բոլորս դա գիտենք: Այնուամենայնիվ, մենք նրան չենք ասում՝ ինչ անել։ Մենք պարզապես նշում ենք, որ ունենք ընդհանուր նպատակ և կարող ենք դրան մոտենալ տարբեր տեսանկյուններից: Սա հենց այն է, ինչ մենք անում ենք»,-եզրափակել է Ռուսոպուլոսը:
Հիմա եթերում
