Ֆրանսիայի իշխանությունը ինչի՞ է սպասում, որ մի քանի շաբաթ հետո հարյուրավոր մարդիկ սովամա՞հ լինեն. Քսավիե Բերտրան

Երկօրյա այցով Հայաստանում գտնվող Փարիզի քաղաքապետի գլխավորած պատվիրակության կազմում էին Ֆրանսիայի ամենահայտնի Հանրապետական, Սոցիալիստական, «Կանաչներ» բնապահպանական, «Մենք Ֆրանսիան ենք» կուսակցությունների ներկայացուցիչներ՝ սենատորներ, պատգամավորներ, քաղաքապետեր և փոխքաղաքապետեր, որոնք ավելի վաղ արձագանքել էին Ֆրանսահայ ընկերակցությունները համակարգող խորհրդի խնդրանքին և միավորել ուժերը՝ Արցախի ժողովրդին օգնություն հասցնելու նպատակով:

Մարդասիրական օգնությունը կազմակերպված էր ֆրանսիական տեղական ինքնակառավարման մարմինների մակարդակով և չէր ներկայացնում պաշտոնական Փարիզի դիրքորոշումը: Ինչպես և կանխատեսվում էր ադրբեջանական կողմը թույլ չտվեց, որ 10 բեռնատարները մուտք գործեն Արցախ:

Ֆրանսիացի քաղաքական գործիչները բոլորն իրենց սոցիալական ցանցերի էջերում ահազանգել են Արցախի ճնգաժամի հարցի մասին: Այդպես նրանք իրենց հետևող հարյուր հազարավոր օգտատերերին իրազեկել են, թե Ադրբեջանն ինչ անմարդկային պայմաններում է պահում Լեռնային Ղարաբաղի քրիստոնյա հայ ժողովրդին:

Ստրասբուգի հայազգի քաղաքապետն իր սոցիալական ցանցերի էջերում հայտարարել է, որ Ադրբեջանը պետք է անհապաղ դադարեցնի Լեռնային Ղարաբաղի շրջափակումը, և առա՛նց նախապայմանի:

«Ես եկել եմ այստեղ բարձրացնելու Եվրոպայի՝ մարդու իրավունքների մայրաքաղաք Ստրասբուրգի ձայնը: Մենք կոչ ենք անում Ֆրանսիային, ինչպես նաև ՄԱԿ-ի ԱԽ-ի անդամ մյուս պետություններին՝ Լաչինի միջանցքը վերաբացելու ուղղությամբ գործուն քայլերի դիմել»,- ընդգծել է Ժաննա Բարսեղյանը, որը Ֆրանսիայի «Կանաչներ« կուսակցության անդամ է:»

Պատվիրակության այցը Հայաստանում լուսաբանել են «Ֆիգարո» օրաթերթի, «Ֆրանս 24»-ի և ֆրանսիական ՏԻՄ-երի տեղական լրատվամիջոցները, որոնց տեսախցիկները Սյունիքի սարերի բարձունքից ֆիքսել են Հակարիի կամրջի վրա տեղակայված ադրբեջանական ապօրինի անցակետը:

Ֆրանսիայի Օ-դը-Ֆրանս երկրամասի նախագահ Քսավիեն Բերտրանը «Ֆրանս 24»-ին հարցադրում է անում, թե Ֆրանսիայի իշխանությունը ինչի՞ է սպասում, որ մի քանի շաբաթ հետո հարյուրավոր մարդիկ սովամա՞հ լինեն: Հարկավոր է՝ բոլորը ոտքի կագնեն:

Ավելի քան 100 մլն լսարան ունեցող «Ֆրանս 24»-ի լրագրողը ռեպորտաժում պատմել է. «Իրավիճակն Արցախում անմխիթար է. առանց բենզինի գյուղատնտեսությունը կանգ է առել, իսկ հաց գնելու հերթերում մարդիկ ժամեր են անցկացնում, թերսնման հետևանքով հղիության վիժեցման ցուցանիշը եռապատկվել է: Այնդուհանդերձ Լեռնային Ղարաբաղի բնակչությունը հրաժարվում է այլընտրանքային ճանապարհով Բաքվից օգնություն ընդունել՝ մտավախությամբ, որ այդկերպ Ադրբեջանը կտիրանա ամբողջ Արցախին»: