Գերիների մասով կարող է թյուրըմբռնում լինել, որովհետև ադրբեջանական կողմը մի մասին ռազմագերի չի համարում, իսկ հայկական կողմն այլ մոտեցում ունի. Գրիգոր Մինասյան
08 Հունվարի 2024, 12:07
![](https://media.alphanews.am/wp-content/uploads/2024/01/08111512/l-ZAcD9KXzPB.jpg)
Բաքվում պահվող գերիների վերադարձով զբաղվում է ՀՀ արտաքին գործերի նախարարությունը: Այս մասին հայտարարել է ՀՀ արդարադատության նախարար Գրիգոր Մինասյանը։
«Բնականաբար, տեղի են ունենում նաև Կարմիր խաչի այցելությունները: Նաև Միջազգային իրավական հարցերով ՀՀ ներկայացուցիչն է ինտենսիվ աշխատանքներ իրականացնում բազմաթիվ միջազգային ատյաններում։ Ես համոզված եմ, որ աշխատանքները, որ տարվում են, մեծածավալ են ու առաջիկայում հնարավորություն կունենանք միջազգային ատյանների կողմից հաստատված որոշումներով ներկայացնել, թե ուր ենք հասել», — ընդգծել է Մինասյանը:
Նա գերիների՝ կոնկրետ թիվ չի նշել ու հավելել է, որ հենվում է ՀՀ քննչական կոմիտեի կողմից ներկայացված տվյալնեի վրա։
«Կարող է թյուրըմբռնում լինել, որովհետև ադրբեջանական կողմը մի մասին ռազմագերի չի համարում, իսկ հայկական կողմը այլ մոտեցում ունի, դրա համար եկեք առաջնորդվենք այն տվյալներով, որ ներկայացնում է ՀՀ քննչական կոմիտեն», — ասել է Արդարադատության նախարարը։
Հիշեցնենք՝ ՀՀ քննչական կոմիտեի նախագահ Արգիշտի Քյարամյանը հայտարարել էր, որ այս պահին Ադրբեջանի կողմից հաստատված 23 գերի կա, որոնցից 17-ը 2023 թվականի ագրեսիայի հետևանքով պատանդառված անձինք են։ Բացի այդ, ըստ ՔԿ նախագահի, հայկական կողմը փաստական տվյալներ ունի 44-օրյա պատերազմից հետո 32 անձի բռնի անհետացման մասին։