Գերմանացի կոմպոզիտոր Մարկուս Շտոկհաուզենը Հայաստանում է․ երաժիշտը՝ երեւանյան տպավորությունների ու առաջիկա համերգների մասին

Հայտնի շեփորահար եւ կոմպոզիտոր Մարկուս Շտոկհաուզենը համերգներով հանդես կգա Հայաստանում։ Գերմանացի կոմպոզիտորը ելույթներ կունենա Դիլիջանում եւ Երեւանում, կմասնակցի նաեւ Հայաստանի պետական ֆիլհարմոնիայի մարզային համերգաշարին։

«Առաջին անգամ եմ Հայաստանում։ Շատ ուրախ եմ, որ այստեղ եմ։ Եղել եմ Մոսկվայում, Թիֆլիսում, տարածաշրջանում մի շարք այլ քաղաքներում, բայց այստեղ չէի եղել։ Ուրախ եմ այցիս ու այստեղի երաժիշտների հետ համագործակցությանս համար»,-այսօր՝ հունիսի 7-ին կայացած մամուլի ասուլիսի ժամանակ նշեց երաժիշտը։ Շտոկհաուզենը հավելեց, որ համերգին հնչելու են ինչպես հեղինակային, այնպես էլ իմպրովիզացիոն գործեր։ 

Մարկուս Շտոկհաուզենը անվանի կոմպոզիտոր Կառլհանց Շտոկահուզենի  որդին է։ Նա պատմում է, որ ժամանակին կատարել է հենց հոր ստեղծագործությունները, մինչեւ 2001-ին որոշել է կենտրոնանալ սեփական գործերի վրա։ 

«Հայաստանյան համերգների ծրագրում կհնչեն նաեւ ինտուիտիվ ատեղծագործություններ։ Այդ ոճը հայրս է առաջ բերել 1968 թ-ին, եւ արդեն 40 տարուց ավել է՝ ես առաջնորդվում եմ այդ ուղղությամբ»։

NEWS.am STYLE-ի հարցին, թե ինչպես է անցկացնում իր ժամանակը Հայաստանում, կոմպոզիտորը պատասխանեց․

«Առավոտյան եմ ժամանել Երեւան։ Առաջին բանը, որ արեցի, ուսումնասիրեցի այն տարածքը, մարդկանց, որտեղ գտնվում էի։ Տեսել եմ, թե ինչ եք բերել Արեւմուտքից, զգացել նաեւ եվրոպական ազդեցություն։ Հույս ունեմ՝ ավելին բացահայտելու ու զգալու։

Բոլորը խոսում են այն սարի մասին, որը հիմա Հայաստանի տարածքում չէ, բայց Հայաստանինն է (նկատի ունի Արարատը)։ Գիտեմ, որ Արմենիա բառի «Ար»-ը նշանակում է լույս, կրակ։ Միշտ լույս եղեք»։

Գերմանացի կոմպոզիտորը հունիսի 8-ին, ժամը՝ 19:00-ին, հանդես կգա Դիլիջանում, հունիսի 9-ին՝ նույն ժամին, ելույթ կունենա Առնո Բաբաջանյանի անվան համերգասրահում։ Հունիսի 10-ին հանդես կգա նաեւ վարպետության դասով։