Գևորգ Վարդանյան․ Խորհրդային Միության հերոսը

Alpha News-ը շարունակում է ներկայացնել «Ալֆա պերսոնա» շարքը:

Փետրվարի 17-ին լրանում է մեծ հետախույզ, ստրատեգ, ԽՍՀՄ հերոս Գևորգ Վարդանյանի ծննդյան 100-ամյակը:

Գևորգ Անդրեյի Վարդանյանը ծնվել է 1924թ. փետրվարի 17-ին: Արտերկրում տասնամյակների քրտնաջան աշխատանքի ընթացքում նա որևէ ձախողում չի ունեցել, չի կորցրել կապը ոչ մի տեղեկատուի հետ:

Վարդանյանի ծառայությունն այնքան անբասիր էր, որ նրա իսկական անունը գաղտնազերծվեց միայն 2000 թվականի դեկտեմբերին, և շատ մանրամասներ մնացին գաղտնիության քողի տակ։ Օրինակ, մինչ օրս ոչ ոք չգիտի, թե կոնկրետ ինչ ութ լեզուների էր տիրապետում Գևորգ Վարդանյանը։

Հետախույզի դժվարին ճանապարհը սկսվել է Թեհրանում, երբ անչափահաս տարիքում իր հասակակիցներից իսկական հետախուզական խումբ հավաքեց։
Ստալինի, Չերչիլի և Ռուզվելտի դեմ մահափորձը կանխելու գործողությունը 1943թ. Թեհրանում կայացած համաժողովի ժամանակ դարձավ Վարդանյանի գլխավոր սխրանքներից մեկը:

Չի կարելի չնշել, որ ողջ կյանքի ընթացքում Գևորգ Անդրեևիչի զուգընկերն ու ամենամտերիմ մարդը եղել է նրա կինը՝ Գոհարը։ Նրանք ամուսնացել են 1946 թվականին։ Հայրենական մեծ պատերազմի ավարտից մի քանի տարի անց երիտասարդ ընտանիքը տեղափոխվեց Երևան՝ կրթություն ստանալու։ 1955 թվականից նրանք կրկին սկսեցին աշխատել խորհրդային հետախուզության համար և գնացին արտերկիր։ Իրենց երկարատև աշխատանքի ընթացքում զույգը ևս երեք անգամ ամուսնացել է տարբեր երկրներում՝ նոր փաստաթղթեր ստանալու համար:

Վարդանյանն ուներ յուրահատուկ որակներ, որոնք նրան դարձնում էին ամենաբարձր դասի հետախույզ՝ անհավանական հնարամտություն, արագ կողմնորոշում։

Նրա պարգևներն ու մեդալները հնարավոր չէ հաշվել, քանի որ տարիների բեղմնավոր աշխատանքի ընթացքում նա շատ բան է արել Խորհրդային Միության համար։

Գևորգ Անդրեյի Վարդանյանը կյանքից հեռացել է 2012 թվականի հունվարի 10-ին: