Հադրութի կրթօջախների սաները մայրաքաղաքում մշակութային միջոցառում են կազմակերպել
01 Հունիսի 2023, 12:35
Այսօր՝ մայիսի 31-ին, բռնազավթված Հադրութի շրջվարչակազմի աշխատակազմի նախաձեռնությամբ և շրջանի գործող ՊՈԱԿ-ների ընդգրկմամբ Ստեփանակերտի Շառլ Ազնավուրի անվան մշակույթի կենտրոնում միջոցառում է կազմակերպվել։
«Արցախպրես»-ի թղթակցի հետ զրույցում Հադրութի շրջվարչակազմի ղեկավար Արթուր Բաղդասարյանն ասել է, որ օրն առիթ է, որպեսզի հադրութցիներով նորից հավաքվեն ու հիշեն հայրենի եզերքում ապրած նվիրական ժամանակները:
«Հադրութ շրջկենտրոնի և Տողի Արվեստի դպրոցների, Մանկապատանեկան ստեղծագործական կենտրոնի, Մ. Մանվելյանի անվան կրթօջախի և «Դիզակ» մանկապարտեզի սաների մասնակցությամբ նախաձեռնեցինք և կազմակերպեցինք հիանալի մշակութային միջոցառում, որտեղ մեր փոքրիկ հադրութցիները թե՛ մեզ, թե՛ իրենց ծնողներին ներկայացան նորովի»,-նշել է Ա. Բաղդասարյանը` կարեւորելով` միջոցառմանը մասնակից բոլոր ՊՈԱԿ-ները, պատերազմից հետո Ստեփանակերտում վերաբացվելով, տարբեր դժվարություններ հաղթահարելով, նվիրումով շարունակում են իրենց գործունեությունը։
Ըստ մեր զրուցակցի` շարունակական աշխատանքի շնորհիվ կազմակերպվող նման միջոցառումները իրենց հույս ու հավատ են ներշնչում, որ դեռ ամեն բան ավարտված չէ, որ Արցախը մնալու է հայկական և լուսավոր ապագա է ունենալու։
Հիմա եթերում
